Кёп болмай КъМР-ни саулукъ сакълау министри Рустам Калибатов Нальчикни 3-чю номерли поликлиникасыны Мечи улу орамда орналгъан бёлюмюнде тынгылы ремонт ишле къалай баргъанлары бла шагъырейленнгенди.

Беш къатлы мекям борчун 1978 жылдан бери толтурады, болсада кёп заманны ичинде анга тийишли халда бир да къаралмагъанды. Ол себепден «Саулукъ сакълау» миллет проектге кёре ол кемчиликни тюзетирге онг табылгъанды.

Бюгюнлюкде медицина учреждение эсепде болгъан 23 минг адамгъа къарайды. Орта эсеп бла алып айтханда, бери сменагъа 264 саусуз келеди.  Кюндюз стационарында да 32 жатар жери барды.

Алгъаракълада къурулушчула юйню башында къанжалларын алышып, инженер коммуникацияларын жангыртып, от тюшгенни билдирген системаны тартып бошагъандыла. Саусузлагъа таплыкъгъа бусагъатда лифт салып кюрешедиле. Алгъын аны болмагъаныны хатасындан кёплеге къыйналыргъа тюшгенди.

Министр кёргенине ыразы болгъанды, бир къауум шарт бла байламлы эсгертиуле да бергенди. Ол санда стационар толусунлай «аяулу поликлиника» амалгъа келиширге кереклисине энчи эс бургъанды.

Планнга кёре, объект быйылны ахырына хайырланыргъа берилирге керекди.