КъМР-ни Табийгъат байлыкъла эмда экология министерствосуну келечилери къатышып Элбрусда Минги тауну этегин тазалар хыйсапда «Чистая гора - 2024» деген уллу экология акция бардырылгъанды.

Эсге сала айтсакъ, ол 2018 жылда башланып бир къауум адамны башламчылыгъы уллу фестивальгъа айланнганды. Аны магъанасы табийгъатны тазалай сакъларгъа, жерлешлерибиз, туристле да тауладан зауукълукъ табарча, бу жаны бла жамауатны, бютюнда ёсе келген тёлюню сезимин кючлерча этергеди.

Жыл сайын магъаналы ишге кёпден-кёп адам къошулгъаны бек къууандырады. Алай бла экология болумну игилендириуге бизни республикадан сора да, иш этип къыралны бирси регионларындан да иги кесек адам келедиле. Ала, къауумлагъа юлешинип, тюрлю-тюрлю тийреледе ишлейдиле.

Ахырында акциягъа къатышханланы татымлы тау азыкъла бла сыйлагъандыла. Эм уллу саугъагъа уа хар кимни да кёлюн кётюрген, бай концерт программаны санаргъа боллукъду.