УФ-м и Федеральнэ таможеннэ къулыкъум иджыблагъэ къызэритамкIэ, 2024 гъэм и щIышылэ - бадзэуэгъуэ мазэхэм къриубыдэу Къэбэрдей-Балъкъэрым и мэкъумэш-промышленнэ комплексым и продукцэу доллар мелуан 23,9-рэ и уасэ хамэ къэралхэм яхуригъэшащ. Дызэрыт илъэсым абыкIэ ятелъ къалэным псори зэхэту процент 72-кIэ щIрагъэгъуащ.

Къэбэрдей-Балъкъэрым нэхъыбэу ираш гъавапхъэхэр, IэфIыкIэр, кхъуейхэкIыр, лыр, нэкулъ лIэужьыгъуэхэр, фадэхэкI-псыIэфIхэкIхэр, крахмалыр, спиртыр, Iусыпхъэхэр, нарзаныпсыр, хадэхэкI гъэфIэIуахэр, нэгъуэщIхэри. Ахэр яIэрохьэ Куржым, Абхъазым, Узбекистаным, Тыркум, Азербайджаным, Армением, Къыргъызым, Белоруссием, Таджикистаным, Къэзахъстаным, Тыркумэным, Молдовэм, Осетие Ипщэм - псори зэхэту къэралым 20-м щIигъум.

Псалъэм папщIэ, дызэрыт илъэсым и щIышылэ - мазаем хуэзэу нартыху жылэу тонн 800,5-рэ ярищащ Белоруссиемрэ Къэзахъстанымрэ икIи ар процент 25-кIэ нэхъыбэщ гъэ кIуам и апхуэдэ лъэхъэнэм  къриубыдэу  щыIа бжыгъэхэм елъытауэ. Абы нэмыщI, нартыху жылэу тонни 6 Ермэлым япэу хурагъэшащ.

Апхуэдэуи ди республикэм къыщыщIагъэкI продукцэхэм я фIагъыр зыхуэдэр щащIэ Монголием, Хьэрып Эмират Зэгуэтхэм, Китайм (IэфыкIэхэр), США-рэ Канадэмрэ (псыхэкIхэмрэ нарзаныпсымрэ), нэгъуэщI щIыпIэхэми.