Кавказ.РФ-м и мылъку хэлъу Бахъсэн щIыналъэм щыIэ «Агрохолод» компанием пхъэщхьэмыщхьэ хъумапIэ иджыблагъэ къызэIуихащ, зэуэ тонн мин 7 щыпхуэхъумэу.

         Мы гъэм мыIэрысэ Iухыжыгъуэм ирихьэлIэу Бахъсэн къалэм игъуэтащ пхъэщхьэмыщхьэ хъумапIэ нэхъ ин дыдэхэм ящыщ, иджырей технологиехэмрэ щIыIалъэ оборудованэхэмкIэ къызэгъэпэщауэ. Абыхэм я фIыгъэкIэ пхъэщхьэмыщхьэхэм уемыIусэу, лейуэ уакIэлъымыплъу, пIалъэ кIыхькIэ щыбгъэлъ хъунущ. МыIэрысэхэр зэрызэхадз иджырей технологие Iэмалхэр абы къызэрыщагъэсэбэпым къыхэкIыу, Кавказ Ищхъэрэм и сату щIыпIэ нэхъ инхэм пхъэщхьэмыщхьэ IэфIхэр илъэс хъурейкIэ я полкэхэм трагъэлъыфынущ.

«Къэбэрдей-Балъкъэрым дежкIэ мыр Iуэхугъуэ щхьэпэщ. Республикэм жыджэру мыIэрысэ жыг хадэхэр щагъэтIыс. Абы къыхэкIыу, пхъэщхьэмыщхьэ кърахьэлIэжар щахъумэн щIыпIэхэр куэду яIэн хуейщ, цIыхухэр илъэс хъурейкIэ пхъэщхьэмыщхьэкIэ къызэгъэпэща хъун папщIэ. Псалъэм къыдэкIуэу, мыIэрысэ къыпычыгъуэр иджыпсту къэблэгъащ, дэри абы, зэрыжаIэу, дыхуэхьэзырщ.

Иджырей пэхуэщIэм и фIыгъэкIэ, пщIырыпщI бжыгъэкIэ щIыналъэм и цIыхухэр лэжьыгъэ IэнатIэхэмкIэ къызэрагъэпэщынущ. Бахъсэндэсхэм я дежкIэ абы мыхьэнэшхуэ иIэщ.

Абдежым дыкъыщызэтемыувыIэу ди пэхуэщIэм адэкIэ пыдощэ, инвесторхэм дазэрыдэлэжьэн нэгъуэщI IэмалыщIэхэри къыдогъуэт», - жиIащ Кавказ.РФ-м и унафэщIым и япэ къуэдзэ Цемахович Андрей.

Къыхэдгъэщынщи, иджы яухуа «Агрохолод»-м и пхъэщхьэмыщхьэ хъумапIэм ахъшэу сом мелуан 600-м щIигъу текIуэдащ, абы щыщу мелуан 242-р Кавказ.РФ-м къыбгъэдэкIащ.