Аэропорт къатында Ю.А.Гагарин атлы сквер барды. Эрттен сайын бери кёп адам чыгъып, жарау этедиле. Жаяу айланнганла, чапханла да бар. Александр Емельянов бла Жашууланы Ануар бир юйде жашайдыла, эрттен сайын былайда жарау этип башлагъанлы сегиз жыл болады. Къара ишге юйреннген жашла пенсиягъа чыкъгъанда да, юйлеринде олтуруп турмайдыла, саулукъларына сакъдыла. Кюн сайын физкультура бла кюрешгенни саулукъгъа магъанасын айта, Александр Емельянов былай деди:
- Жаш заманымда Нальчикде Ватутин атлы орамда жашагъанма. Кёп къатлы юйлени арбазында суу къуюп, алайда хоккей ойнарча буз майданчыкъ эте эдик. Ол тийреде жашагъан жашчыкъланы бирлери СССР-ни, башхалары Финляндияны, Чехословакияны, ючюнчюлери Швецияны жыйымдыкъ командаларыча болуп, алай ойнаучу эдик. Ойнарча клюшканг, шайбанг болса уа.
Пятиборье бла кюрешгенме, шпага бла сермеширге юйреннгенме. Жылны кезиуюне кёре бир тюрлю оюнубуз болуучу эди. Шёндюгюле лянга оюнну не болгъанын да биле болмазла. Бассейннге жюзерге жюрюгенбиз. Кюн сайын жарау этип турмасакъ да, орамдан жыйылмаучу эдик. Сора къыралны аллында сыйлы борчубузну толтурургъа тебирей туруп, хазыр аскерчиле болуп къалыучу эдик. Эндиги тёлю уа юйден чыкъмайды…
Ол аны айтханлай, чабып келдиле жаш адамла алайгъа. Насыпха, барды жаш тёлюню арасында да саулукълары ючюн кюрешгенле.
- Кёнделенде жашагъанымда, бизни хоккей ойнаучу жерибиз суу жагъада буз къауданда болуучу эди. Элни башында жашагъанла тёбеннгиде тургъанла бла ойнаучу эдик, - дейди Жашууланы Ануар.
Скандинавия жаяу жюрюу бла кюрешген Маир Настиев да скверге хар эрттен сайын чыгъады. Жашла жангыз бир жарсыулары болгъанын айтдыла. Бу скверни тапландыргъынчы, жарау этерча тогъуз снаряд бар эди. Тынгылы темирден этилген, бир ненча жылны жарау этерге жарап тургъанланы орунуна тёртюсюн салгъандыла. Ала уа аз заманны ичинде сыннгандыла. Алайда ремонт этип неда башхала орнатылсала, ыразы боллукъларын да айтадыла ала. Жашла кюн сайын 5-8 километр айланып чыгъадыла. Ингирде уа туудукълары бла бирге чыкъсала уа, эртеннги жарауларын да унутдурадыла ала, аппаларын къыллаучада учаргъа тартып.
- Кёп болмай Анапада солуп къайтханма. Ары къыралны къайсы регионундан да келедиле. Тепмей тура болурла ансы, андагъы жаш адамланы асламысы тюз жау чулгъамла кибикдиле. Бизни республиканы жаш тёлюню саны-чархы бек омакъды. Ол алай мында тап ашны ашагъанлары ючюн сунама, дейди Александр.
