«Спартак-Налшык» - «Динамо Ставрополь»: 0:1 (0:1). Налшык, «Спартак» стадионым. ШыщхьэуIум и 20-м. ЦIыху 300 еплъащ.
Судьяхэр: Самсонов (Мэзкуу область), Харченкэ (Дон Iус Ростов), Козленкэ (Сочэ).
«Спартак-Налшык»: Къумыкъу, КIэдыкIуей, Далиев Дауд (Къардэн, 84), Лелюкаев, Молэмусэ (Блий, 84), Сэбаншы, ХьэцIыкIу (Селяев,76), Мэкъуауэ (Мэшыкъуэ, 46), Хьэшыр, Далиев Дени, ЛIуп.
«Динамо Ставрополь»: Матюшэ, Кокоев, Ярцев, Алибеков, Мэкъуауэ (Макаров, 55), ДыщэкI, Машэжь (Кочканян, 62), Магомедов, Болгов, Зароченцев, Мичуренков (Абдулхамидов, 55).
Топыр дигъэкIащ Зароченцевым, 39 (0:1).
Дагъуэ хуащIащ Матюшэ, 90.
Урысей Федерацэм футболымкIэ и Кубокыр 2024/2025 гъэхэм къэхьыным теухуауэ зэхаубла зэхьэзэхуэм и финалым и 1/128-нэ Iыхьэм ипкъ иткIэ Налшык и «Спартак»-м деж къеблэгъат Ставрополь и «Динамо»-р.
Пэжыр жыпIэмэ, зэIущIэм щIимыдзэ щIыкIэ гугъэшхуэ щыIауэ къыщIэкIынкъым, налшыкдэсхэр хьэщIэхэм ятекIуэфыным теухуауэ. Уеблэ-мэ «Спартак-Налшыкым» чемпионатым къыщыпэщылъ къалэн нэхъыщхьэхэр абы зыщыгъэбыдэнымрэ турнир таблицэм ищхьэIуэкIэ щыдэкIуэтеинымрэ арауэ зэрыщытыр къэплъытэмэ, нобэрей зэIущIэр IэхъуэгъуэтегъэкIыу, къару куэди тримыгъэкIуадэу иригъэкIуэкI хъунугъэнт, апхуэдэу къэзылъытэхэри щыIэт.
Ауэ ди командэм и мурадхэр нэгъуэщIт - абы и топджэгухэр губгъуэм къихьат зэIущIэм кIэлъыплъыну къэкIуахэм, мащIэу щытми, я дэрэжэгъуэр къыхуаIэтыну, джэгукIэ дахэ къагъэлъэгъуэну, псом ящхьэжращи, я текIуэныгъэ дахэмкIэ ягъэгуфIэну. АрщхьэкIэ, ди жагъуэ зэрыхъущи, хьэщIэхэм апхуэдэ гуфIэгъуэ къыдатакъым. «Динамо Ставрополь»-м турнир таблицэм етIуанэ увыпIэр ауэ сытми зэрыщимыIыгъыр дигъэлъагъуу, зэIущIэр жыджэру иригъэжьащ.
ХьэщIэхэр нэхъ лъэщу къыдэбгъэрыкIуэрт, ди гъуэр къащтэну къызэрагъэпэщ Iэмалхэми гупсысэ хэлът. ЗэIущIэм и япэ Iыхьэм щIидза къудейуэ, Ставрополь къалэм къикIахэм ди гъуэр къахуэщтэну щы-тащ. ЯпэщIыкIэ Мичуренков Дмит-рий зэуа топыр гъуэм дыхьэным зымащIэ иIэжу щхьэпрылъэтащ. Абы иужькIэ ди «штрафнойм Машэжь Ратмир къилъадэри, штангэм блэукIащ. ИужькIэ, угловой къыхатам Кокоев Давид фейдэ къыхухэхакъым. ЩхьэкIэ ар зэуа топыр гъуэм хухуэгъэзакъым.
Налшыкдэсхэри, къэбгъэлъагъуэмэ, хуэмыхуакъым: ахэри зэ-тIэу къызэпхрыукIащ. Псом хуэмыдэу IэмалыфI иIащ Далиев Дени, ауэ ар зэуа топым IэкIуэлъакIуэу къыпэщIэуващ хьэщIэхэм я гъуащхьэтет Матюшэ Максим. ИужькIи, и Iэзагъэр къигъэлъагъуэу, къригъэгъэзащ Хьэшыр Алан и топым, кIэщIу абы кIэлъыуэжа ЛIуп Ислъам гъуэ нэщIым хуэзакъым.
Дапхуэдизу ди командэр хьэщIэм ебгъэрыкIуами, зэIущIэм и бжыгъэр хьэщIэхэм ди япэ къызэIуахащ. Губгъуэм и ижьырабгъу лъэныкъуэмкIэ Мэкъуауэ Залым къыхита топыр Зароченцев Александр, ди щIалэхэм яхэжри, гъуэм дигъэкIащ. Ар къыщыхъуар 39-нэ дакъикъэр екIуэкIыущ.
ИужькIэ, зэIущIэр и кIэм нэсыху налшыкдэсхэм топыр яIыгъащ, хьэщIэхэри езыхэм я лъэныкъуэм ираубыдэри, кърагъэкIакъым, ауэ ди щIалэхэм абы зы фейдэ къахухэхакъым. «Динамо-Ставрополь»-ри хуэныкъуэщакъым бжыгъэр нэхъыбэ ищIыну. АбыкIи арэзыуэ зэIущIэр и кIэм нигъэсащ икIи адэкIэ кIуэтащ. Дэ зэхьэзэхуэм абдежым дыкъыщыпыхуащ.
Иджы, къыкIэлъыкIуэ зэIущIэм Шакъ Ашэмэз зи тренер нэхъыщхьэ «Динамо Ставрополь»-м Псыхуабэ къалэм и «Мэшыкъуэ-КМВ»-р къащыпоплъэ. Ар щекIуэкIынур шыщхьэуIум и 26 - 27-хэрщ.
