2024 гъэм и щIышылэ – бадзэуэгъуэ мазэхэм къриубыдэу Урысей Федерацэм къызыхуэтыншэу щызэрагъэпэщыжащ фэтэр куэду зэхэт, псори зэгъусэу цIыху мелуан 1,7-м щIигъу зыщIэс унэхэр. Ар иджыблагъэ жиIащ УФ-м и Правительствэм и УнафэщIым и къуэдзэ Хуснуллин Марат.
«Фэтэр куэду зэхэт унэхэр жыджэру щызэбгъэпэщыжын лъэхъэнэщ гъэмахуэ мазэхэр. Гъэплъыгъуэ зэманыр къэмыс щIыкIэ абыхэм ехьэлIа лэжьыгъэхэм я нэхъыбэр зэфIэгъэкIын хуейщ. Дызэрыт илъэсым зэрыщIидзэрэ унэу мин 11,5-м нэблагъэ къэралым и щIыналъэхэм къызыхуэтыншэу щызэрагъэпэщыжащ. Абыхэм щопсэу цIыху мелуан 1,7-м щIигъу. Лэжьыгъэхэр и кIэм нагъэса иужь, фэтэр куэду зэхэт унэхэм щIэсхэм я псэукIэри ефIэкIуэнущ, тыншыпIи абыхэм ягъуэтынущ. Ди программэхэм щынэхъыщхьэу щытри аращ», - жиIащ Хуснуллин Марат.
УФ-м и Правительствэм и УнафэщIым и къуэдзэм апхуэдэуи къыхигъэщащ фэтэр куэду зэхэт унэхэр зэгъэпэщыжыным ехьэлIа лэжьыгъэхэр къэралым и щIыналъэхэм ящыщу 85-м иджыпсту зэрыщекIуэкIыр. Псори зэхэтуи зэIузэпэщ ящIащ метр зэбгъузэнатIэу мелуан 46-рэ. Зэгъэпэщыжыныгъэ лэжьыгъэхэр и чэзум зэрырагъэкIуэкIым, щIэх-щIэхыурэ зэрыкIэлъыIэбэм и фIыгъэкIэ унэхэр нэхъыбэрэ щытынущ, цIыхухэм шынагъуэншэу нэхъыбэрэ къагъэсэбэпынущ.
Программэм лэжьэн зэрыщIидзэрэ, 2014 гъэ лъандэрэ, фэтэр куэду зэхэт унэу мин 300-м апхуэдэ лэжьыгъэхэр щрагъэкIуэкIащ, абыхэм къызэщIаубыдащ псори зэхэту метр зэбгъузэнатIэу мелард 1-м щIигъу, а унэхэм, нобэкIэ, цIыху мелуан 40,5-рэ щопсэу.
Къэбэрдей-Балъкъэрым зэгъэпэщыжыныгъэ лэжьыгъэхэр мы гъэм жыджэру щрагъэкIуэкI фэтэр куэду зэхэт унэ 75-м. Псори зэхэту абы трагъэкIуэдэнущ сом мелуан 700-м нэблагъэ. Иджыпсту апхуэдэ унэу 61-м лэжьыгъэхэр щрагъэкIуэкI, 14-м ахэр щызэфIэкIащ. Илъэсым зэрыщIидзэрэ лифт 22-рэ зэрахъуэкIыну яхузэфIэкIащ.
А лэжьыгъэхэм хыхьэу унащхьэхэр зэрахъуэкI, унэ IуплъапIэхэр, инженер системэхэр зыхуей хуагъазэ, къагъэщIэрэщIэж, лифтхэр, шахтхэр иджырей мардэм хуагъакIуэ, щIыунэхэр, фундаментхэр ягъэбыдэ, нэгъуэщIхэри иращIылIэ.
Къэбэрдей-Балъкъэрым ПсэупIэхэр сыт и лъэныкъуэкIи къызыхуэтыншэу зэгъэпэщыжынымкIэ и фондыр ди щIыналъэм зэрыщылажьэ илъэсипщIым къриубыдэу зыхуей хуагъэзащ фэтэр куэду зэхэт унэу 600-м нэблагъэ, лифту абыхэм щызэрахъуэкIащ 200-м щIигъу. Фондым нэгъабэ иригъэкIуэкIа лэжьыгъэхэмкIэ къэралым щыпэрытхэм яхыхьащ.
