КъМР-ни Къурулуш эмда жашау журт-коммунал мюлк министерствосундан билдиргенлерича, бу кюнледе Хабазда «Жашау журт эм шахар болум» миллет проектни «Иги шахар болум къурау» деген программасына тийишлиликде омакъ сквер ишленнгенди. Ол мектепни, Маданият юйню эм амбулаторияны къатында болгъаны себепли, эллилеге бек магъаналыды.

Проектге кёре къурулушчула уллу тюрлениуле кийирмезге, тийрени къурамын бузмазгъа кюрешгендиле. Эм игиси уа мындан кийик табийгъат эм Малка суу да аламат кёрюнедиле. Ол а кёзню къууандырыргъа эм жюрек тынчлыкъ тапдырыргъа да ахшы себеплик этерикди.

Эсге сала айтсакъ, сквер бош тургъан жерде къуралгъанды. Энди элни жамауаты эм къонакъла да солургъа, тюбешиуле къураргъа эм заманларын зауукълу ётдюрюрге онг табарыкъдыла.

Андан сора да, Зольск районну Залукодес бла Шордаково эллеринде да паркла къурала турадыла. Алада да омакъ плитка, чыракълы чыпынла, кир-кипчик атарча орунла, шинтикле салынырыкъдыла эм ахырында жашиллендириу мадарла этилликдиле. Алада, солугъандан сора да, тюрлю-тюрлю акцияла бардырыргъа, жамауат бирлеширча мадар тапдырыргъа жарарыкъды. Объектле жайны ахырына хайырланыргъа берилирге керекдиле.

Сагъынылгъан проектлени чеклеринде алты жылны ичинде Зольск районда кёп фатарлы 21 юйню арбазы, жамауат аслам хайырланнган 16 жер, 6 майдан, 5 сквер, 3 парк эм биришер сквер бла стела жангыртылгъандыла. Саулай алып айтханда, игилендириу ишле эллени барында да бардырылгъандыла.