Оперэ уэрэджыIакIуэ цIэрыIуэ, КъБАССР-м щIыхь зиIэ и артисткэ, Кавказ Ищхъэрэм ГъуазджэхэмкIэ и къэрал институтым илъэс куэдкIэ щезыгъэджа Бэгъуэтыж Светланэ къызэралъхурэ шыщхьэуIум и 13-м илъэс 85-рэ ирикъуащ.

«СыщIэтIысхьащ. Мазэ нэхъ семыджауэ, си тхьэкIумэм къицырхъащ музыкэ училищэ къызэрызэIуахар. ИкIи куэдрэ сыгупсысакъым», - къыхощыж абы и гукъэкIыжхэм.

Зэрысабийрэ уэрэд жыIэным щIэхъуэпсу къыдэкIуэ-тея хъыджэбзыр япэщIыкIэ медицинэ колледжым щIэтIысхьат, и адэ-анэм я жыIэм едаIуэри. Мазэ нэхъ дэмыкIауэ, Налшык Музыкэ училищэр къызэрыщызэIуахар щызэхихым, куэдрэ мыгупсысэу абы щIэтIысхьащ. И адэ-анэм ар къыщащIар мазитI дэкIыжа нэужьщ. 1960 гъэм училищэр къиухри, Светланэ и щIэныгъэм щыхигъэхъуащ Собинов Леонид и цIэр зэрихьэу Саратов дэт консерваторэм. Ар иригъэджащ музыкант, егъэджакIуэ Iэзэ Шейблер Трувор.

1965 - 1969, 1977 - 1998 гъэхэм Светланэ щылэжьащ Къэбэрдей-Балъкъэрым и къэрал филармонием, ди республикэм и Музыкэ театрым. Абы и утыкум щигъэзэщIа оперэ партиехэмрэ романсхэмрэ, адыгэ лъэпкъ уэрэдыжьхэр цIыхухэм гуимыхуж ящыхъуат, апхуэдизкIэ и макъыр телъыджэти.

Щэнхабзэмрэ гъуазджэмкIэ колледжым, Кавказ Ищхъэрэм ГъуазджэхэмкIэ и къэрал институтым Светла-нэ зэрыщылэжьа илъэсхэм уэрэджыIакIуэ хъуну хуей куэдым гъуэгугъэлъагъуэ, ущиякIуэ яхуэхъуащ.

Оперэ уэрэджыIакIуэ хъуным къыхуигъэщIа Светланэ дзыхь къыхуащI ролыщIэхэм елIалIэу елэжьырт икIи цIэрыIуэ ирихъун хуэдэу къехъулIэрт. Апхуэдэ лэжьыгъэхэм ящыщщ Мадинэ (Балэ Мухьэдинрэ Къардэн Хьэсэнрэ зэдатха «Мадинэ» оперэм), Виолеттэ (Верди Джузеппе и «Травиата»-м) сымэ я партиехэр. ХьэIупэ ДжэбрэIил и адыгэ бзылъхугъэ уэрэдхэр 1983 гъэм япэу жызыIари Светланэщ, «Зу-зу, баринэ» Iыхьэм щыщ уэрэдипщIи Композиторхэм я унэу Москва дэтым - щигъэзэщIат абы.

Бэгъуэтыжым адыгэбзэкIэ и уэрэд жыIэкIэр зыхуэбгъа-дэ хъун щымыIэщ! Ар ядэлэжьащ республикэм и композитор, усакIуэ куэдым, Темыркъан Борис, ХьэIупэ ДжэбрэIил, КIыщокъуэ Алим, Тхьэгъэзит Зубер жыпIэми.

Опереттэ зыбжанэми хэ-тащ Бэгъуэтыж Светланэ, сыт хуэдэ лэжьыгъэми еплъын, ар гъэунэхун хуейуэ къилъытэрти. Адыгэ уэрэдыжь куэди игъэзэщIащ, мыкIуэдыжыну лъэпкъым къыхуэнэну. Псалъэм папщIэ, композитор Даур Аслъэн Светланэ игъэзэщIэну къыхуихьауэ щытащ «Шэрджэс цIыхубэ уэрэдхэр». Ахэр пластинкэм тету къэнащ. Апхуэдэу ХьэIупэ ДжэбрэIили оркестровкэ хуищIауэ щы-тащ Светланэ иригъэгъэзэщIа уэрэд зыбжанэм. Шахгалдян Артемий и «Си нэ дахэ», «Университетский вальс» уэрэд цIэрыIуэхэр, Молэ Владимир и «Школьный вальс»-р, Къардэн Хьэсэн, Балэ Мухьэдин сымэ макъамэ зыщIалъхьауэ Светланэ жиIахэр Къэбэрдей-Балъкъэрым и гъуазджэм и дыщэ гъэтIылъыгъэ хъуащ.

Романс зыгъэзащIэхэм я Кавказ Ищхъэрэ щIыналъэ зэпеуэм япэ увыпIэр къыщихьауэ щытащ Светланэ. Куэд мэхъу апхуэдэ лэжьыгъэхэр.

Фильмхэм зэрыщыджэгуари гукъинэжщ. Абыхэм я зы щапхъэщ «ЩIымахуэ жэщ» жыхуиIэр. Псалъэншэу, абы щыгъуэми и гурыгъу-гурыщIэ псори и нэгум къищу, актрисэр зэрыджэгур гуимыхужт.

КъБР-м и Композиторхэм я зэгухьэныгъэм я япэ съездым Бэгъуэтыж Светланэ щигъэзэщIат ХьэIупэ ДжэбрэIил сабийхэм яхуитха уэрэд зыбжанэ. Абы ирагъэблэгъа композитор цIэрыIуэ Френкель Ян къыбгъэдыхьэри, Светланэ къехъуэхъуат зэфIэкI зиIэ уэрэджыIакIуэу, драмэ актрисэу къызэрилъытэр къыхигъэщу.

КъызэрыщIэкIымкIэ, Светланэ и унэцIэр Гугъуэтыжщ. ЛУГ-м (Ленинскэ учебнэ городокым) япэу щIэтIысхьауэ щытахэм ящыщ Батыр (Светланэ и адэм) урысыбзэ ищIэртэкъым. «Уи унэцIэр хэт?» - жаIэу къыщеупщIым, адыгэбзэкIэ: «Гугъуэтыж», - жиIэри жэуап итащ. Дэфтэрхэр Iызыхым зэрызэхихам хуэдэу итхащ. ИлъэсиплIыр дэкIауэ къызэриухамкIэ тхылъыр къыщратыжым, абы итыр Бэгъуэтыжт. Мыракъым си унэцIэр, жиIа щхьэкIэ, зыри къедэIуакъым. Арати, апхуэдэу къэнауэ нобэми йокIуэкI. «Дунейм щехыжам Гугъуэтыжу ятхыжауэ аращ ди адэр, - жеIэ Светланэ. - Сэ сценэ цIэ лей схуэхъуащ ар, си дэлъху нэхъыжьымрэ дэлъху нэхъыщIэм и къуэмрэщ а унэцIэр зезыхьэр. Гугъуэтыжхэ зэрыщыту зэрызиблагъэри си къуэпсхэр Урыху (Къуэгъуэлъкъуей) къуажэм къызэрыщежьэри зэи зыщызгъэгъупщакъым, пщIэ, нэмыс яхуэсщIу, сакIэлъыкIуэу апхуэдэщ.