ШыщхьэуIум и 10-м Урысей Федерацэм щагъэлъэпIащ Физкультурникым и махуэр. Абы хуэгъэпса «Зарядка со стражем порядка» урысейпсо акцэм Къэбэрдей-Балъкъэрым и полицейхэри жыджэру хэтащ, спорт Iуэхухэр ныбжьыщIэ цIыкIухэм драгъэкуэкIащ.

Урысей МВД-м и Прохладнэ къудамэм и лэжьакIуэхэм, абы пыщIа Жылагъуэ советым и унафэщI Клюй Андрей ящIыгъуу, Прохладнэ къалэм дэт «Розовый Фламинго» санаторэ-узыншагъэр щрагъэфIакIуэ сабий лагерым щыIэхэм я Iэпкълъэпкъым зрагъэукъуэдиящ.

Абы хэтащ киокушинкай каратэмкIэ урысейпсо зэхьэзэхуэхэм щытекIуахэмрэ призерхэмрэ.

ХьэщIэхэм сабийхэм ирагъэлъэгъуащ зыхъумэжыныгъэ Iэмалхэр. Къызэхуэсахэр яфIэгъэщIэгъуэну а псоми кIэлъыплъащ.

Зэхуэзэм пащэу полицэм и лэжьакIуэ-хэм ныбжьыщIэхэм драгъэкIуэкIащ хьэл мыхъумыщIэхэм зыщадзеиным, къытщIэхъуэ щIэблэр гъэсэным теухуа псалъэмакъ щхьэпэ.

- Узыншагъэ, ехъулIэныгъэ фиIэну, гъэмахуэ зыгъэпсэхугъуэ дахэ, гукъыдэж фи куэдыну си гуапэщ. Дэрэжэгъуэ къозытщ щIэблэ узыншэ къызэрытщIэхъуэр, - къыхигъэщащ Клюй Андрей.

ЗэIущIэм и кIэухыу сабийхэм къызэгъэпэщакIуэхэм фIыщIэ хуащIащ къыдрагъэкIуэкIа спорт Iуэхум папщIэ.