Кёп болмай КъМР-ни аскер комиссариатында аскер комиссар Дмитрий Пахомовну, «Боевое братствону» Къабарты-Малкъарда бёлюмюнден Гелястанланы Барасбийни эм Геннадий Колодяжныйни башламчылыкълары болуп ветеран жамауат организацияланы башчылары бла кенгеш бардырылгъанды.

Аны ишине урушну, урунууну, Сауутланнган кючлени эм ич ишлеринде къуллукъ этгенлени ветеранларыны регион советини таматасы Борис Романенко, ДОСААФ-ны ветеран советинден Хусейн Мацухов, Шимал Кавказны РУБОП-ну ветеранларыны лигасындан Виталий Хапов, КъМР-ни ич ишлерини ветеранларыны советини таматасы Муаед Пихов, Совет аскерлени Германияда къауумуну бизни республикада ветеран союзуну башчысы Анзор Тлепшев, чекчи службаны ветеранларыны регион бёлюмюню таматасы Владимир Сиволобов къатышхандыла.

Жаш тёлю жамауат организацияланы да аскер комиссариат быллай кенгешлеге чакъырыуу энди иги тёреге айланнганды. Бу жыйылыугъа «Волонтёрская рота Боевого братства» (аны келечилери Темуккуланы Мурат бла Валерий Волков), «Молодая гвардия Единой России» (таматасы Альбек Абазов), «Юнармия» регионал бёлюмню келечиси Марат Шибзухов да келген эдиле.

Кенгешде жаш тёлюню жаз башында аскерде къуллукъгъа чакъырыуну, ДОСААФ-да автошколада окъугъанлагъа къагъытларын бериуню, жангы окъуу жылгъа адамланы алыуну, контракт бла къуллукъ этерге баргъанлагъа къаллай хакъ тёлериклерини юсюнден баргъанды сёз.