«Фермерни школу» программаны чеклеринде билим алгъанла кеслерини бизнес-проектлерин къоруулагъандыла. Бу иш Къабарты-Малкъар къырал аграр университетде бардырылгъанды, деп билдиргендиле вузну пресс-арасындан.

Ары жыйылгъанлагъа алгъышлау сёзю бла къошакъ билим бериу эмда тыш байламлыкъла жаны бла проректор Светлана Азикова сёлешгенди. Бу проект университетде тогъузунчу кере бардырылгъанын чертгенди ол эмда «Грант АгроБизнес» конкурс бардырылгъанын эсге салып, анда хорлагъаннга 300 минг сом берилгенин да билдиргенди.

КъМР-ни эл мюлк министрини орунбасары Тимур Вадахов да школну, анда ачыкъланнган темаланы магъанасы уллу болгъанын белгилегенди, аланы юсю бла бизни республикада грантла эмда субсидияла берилгенин да эсге салгъанды.

Окъуучуланы проектлерин сюзген комиссиягъа Тимур Вадахов, вузну къошакъ билим бериу институтуну башчысы Уяналаны Борис бла аны орунбасары Зумакъулланы Фатимат, ветеринария медицина эмда биотехнологияла факультетни деканы Тимур Тарчоков, агрономия факультетни башчысыны орунбасары Аслан Эржибов, секретарь Асият Виндижева киргендиле.

Бизнес-планла эки жаны бла жарашдырылгъан эдиле. Биринчисинде – терек бахчачылыкъгъа жораланнганда, терк айныгъан бахчала къурау, кёкшуу ёсдюрюу бла байламлы ишле кёргюзтюлгендиле. Аланы къурагъанла мюлкледе производствону айнытыу амалланы, тирликни кёбейтирча, продукцияны качествосу да иги болурча не зат этерге боллугъун туура этгендиле.

«Сют малчылыкъ» бёлюмде ишлерин жарашдыргъанла жангы производствола эмда юйюр мюлкле къураугъа къарамлары бла шагъырейлендиргендиле. Быллай малчылыкъны айнытыу тийишли къырал политиканы умутларына эмда борчларына келишеди. Окъуучула республикада жарашдырылгъан продукциягъа сурамны кёбейтирге, бизде производстволаны айнытыргъа, алада жангы технологияланы сингдирирге боллугъун билдиргендиле.

Конкурс комиссияны оноууна кёре, къоруулаугъа чыгъарылгъан бизнес-проектлени бары да хайырлы болургъа ушайдыла.