«Iуащхьэмахуэ» курортым иджы­благъэ къыIэрыхьащ Мэзкуу къалэм и заводым къы­щы­щIагъэкIа, кIапсэ гъуэгухэм ­пкъралъхьэ пкъыгъуэ зэхуэмыдэхэр.

Дызэрыт илъэсым и фокIадэм IэщIагъэлIхэм къапэщылъщ «Мир», «Гарабаши» станцхэм я зэхуэкум дэт, бгым удэзышхэм я щытыкIэр къапщытэну икIи балансирхэр, подшипникхэр, нэгъуэщI пкъыгъуэхэри зэрахъуэкIыну. Ап­хуэдэ лэжьыгъэхэр ирагъэкIуэкI хабзэщ кIапсэ гъуэгухэр псори зэ­хэту сыхьэт мин 22,5-кIэ ягъэлэжьа нэужь. 
«Иджырей техникэ къэпщытэ­ныгъэхэм зыхуэдгъэхьэзыращ кIа­п­сэ гъуэгухэр къыщIэзыгъэкI «Руслет» IуэхущIапIэм и IэщIагъэлIхэр ди гъусэу. Мыбы хьэлэмэту хэлъыр Урысей Федерацэм щыяпэу къэ­ралым и заводхэм щащIа Iэмэ­псымэхэр, пкъыгъуэхэр, хамэ къэ­ралхэм я продукцэхэм дащымыгугъыу, зэрапкърытлъхьэрщ икIи ар узыщыгуфIыкIынщ», - жиIащ «Кав­каз.РФ»-м и унафэщIым и ­къуэдзэ Беккаев Хьиса. 
КъыкIэлъыкIуэ илъэсым апхуэдэ лэжьыгъэхэр щрагъэкIуэкIынущ «Азау», «Кругозор» станцхэм ехьэ­лIауи. Абы нэмыщI, «Мир», «Кругозор» станцхэм я кIапсэ гъуэгухэм кабинэщIэу тIощIым нэблагъэ падзэнущ. 
Фигу къэдгъэкIыжынщи, «Иннопром» фIэщыгъэр зэрихьэу мы гъэм Екатеринбург къалэм щы­зэ­хэта дунейпсо промышленнэ гъэ­лъэ­гъуэныгъэм «Кавказ.РФ»-м и унафэщI Юмшанов Андрей щыжиIауэ щытащ Кавказ Ищхъэрэм и курортхэм папщIэ трактор лъэщу 35 - 40, кIапсэ гъуэгукIэ цIыхухэр къызэрырашэкI кабинэу 19, абы щыщу 10-р бгы лыжэ комп­лексхэм щхьэкIэ, зэрыхуэныкъуэр.