Шимал Осетия-Аланияда бу кюнледе «Тауладады мени жюрегим» деген фестиваль къоншу республикаладан, регионладан, тыш къыралладан да къонакъланы жыйгъанды. Бу байрамны Шимал Осетияны Культура министерствосу къурагъанды. 2 августдан башлап 11 августха дери анда кёп сейир жыйылыула, мастер-классла, байрамла, экскурсияла да боладыла.
Фестивальгъа чакъырылгъан сыйлы къонакъланы санында КъМР-ни культурасыны сыйлы къуллукъчусу Гюзюйланы Тахир, «Ийнар» фольклор-этнография жыр ансамбль эм къобузчу Башийланы Фатима да болгъандыла.
Россей Федерацияны халкъларыны жыр тёрелерине аталгъан байрамны «Песнь о героях» деген тёгерек стол бла башлагъандыла. Анга къатышхан коллективле да аслам болгъандыла. Жыйылыуда РСО-Аланияны культура министрини орунбасары Залина Кусаева келген къонакълагъа быллай уллу ишге къатышханлары ючюн ыразылыгъын билдиргенди. Ызы бла халкъ жыр усталыкъгъа аталгъан доклады бла шагъырейлендиргенди. Жыйылыугъа Кърым Республиканы культурасыны сыйлы ишчилери Ольга Черникова, Карина Хачатрян да къошулгъандыла, кеслерини жыр хазналарыны юсюнден да хапарлагъандыла. Бу байрамны къурагъанла миллетлени бирикдирир ючюн уллу иш тамамлагъанларын, хар къонакъгъа жарыкъ тюбегенлерин да энчи чертип, ыразылыкъларын айтхандыла къонакъла.
Биз хар бирибиз да башха-башха жерледен келгенликге, барыбыз да бирбиз, барыбызны да тауларыбызгъа сюймеклик байлайды, аны себепли фестивальгъа «Тауладады мени жюрегим» деген ат да бек келишеди, бизни барыбызны да тауларыбызгъа, бир бирибизге сюймеклигибиз жюреклерибиздеди, - дегенди Гюзюйланы Тахир.
Тёгерек столдан сора Владикавказны Мир проспектинде ансамбльле, чыгъармачылыкъ къауумла жыйылып, бир бирлери бла танышхандыла, той-оюн этгендиле. Хар миллетни келечилери да кеслерини, адетлерини юслеринден да билдиргендиле. Ызы бла жыйылып, къууанчлы халда проспект бла ёрге баргъандыла.
Бу кюнледе Осетияны интернет ресурсларында «Ийнар» къауум, къобуз да согъуп, Семенланы Исмайылны белгили «Минги тау» жырын айтханлары жайылгъанды, аланы эжиу этип, саулай Шимал Кавказ сюйген жырны эшитдиргенлери ючюн а тынгылагъанла ыразылыкъларын жазадыла.
Экинчи кюн фестивальгъа келген къонакъланы Ирафский районну Задалеск бийик тау элине чакъыргъандыла. Келген къонакълагъа элни сыйлы таматалары аш-суу бла тюбегендиле. Ызы бла «Венок дружбы» деген байрамны башлагъандыла. Келген ансамбльле миллет кийимлерин кёргюзтгендиле, халкъ жырларын эшитдирип, аланы неге жораланнгаларыны, тарыхларыны юсюнден да билдиргендиле. «Ийнар» къауум а нарт эпосда сакъланнган белгили нартларыбызны жашауларына жораланнган халкъ жырланы эшитдиргенди.
Сора «Задалески Нана» майданда «Буруннгулу Аланияны тёрелери» деген акцияны башлап, дюгерлилени «Симд» деген эрттегили халкъ тепсеулерин кёргюзтгендиле, аны бла байламлы мастер-классда уа келгенлени ол тепсеуге юйретгендиле. Анча къонакъ кеслерини миллет кийимлеринде, бир болуп, бир тепсеуде аякъ бюкгенлери уа, керти да, аламат кёрюннгенди.
Анда къууанч халда республиканы къол усталаны ишлерини кёрмючлерини ачылыуу да болгъанды. Ол къонакъланы дюгерлилени культура байлыгъы бла шагъырейлендирип, фахмулу къол усталарыны ишлерин кёргюзтген ариу жумуш болгъанды.
Ючюнчю кюн а Владикавказда уллу гала-концерт да къуралгъанды, ары халкъ жырлагъа тынгыларгъа сюйюп келгенле кёп болгъандыла.
Барыгъызны да бу жарыкъ байрам бла алгъышлайма. Бизни къыралда сейир культуралары болгъан миллетле жашайдыла. Ала барысы да бирлешселе уа, ол бир ариу уллу сурат болады. Бу юч кюнню ичинде къонакъларыбызны хайырларындан жерлешлерибизни, фестивальгъа къатышханланы да ол байлыкъны кёрюрге, халкъ жырланы эшитирге амаллары болгъанды. Аны себепли барыгъызгъа да, бу жумушха къатышханлагъа, ыразылыгъымы билдирме, мындан арысында да быллай фестивальланы бардырып, миллетлени бирикдирип турлугъубузгъа ышанама, дегенди Шимал Осетия-Алания Республиканы культура министрини орунбасары Марина Рамонова.
Белгилегенибизча, байрамда миллетлени сейир жыр хазналарын туура этгендиле. «Ийнар» къауум къараучуланы «Тепена», «Голлу», «Ёрюзмек», «Юч батыр» халкъ жырладан попурри эм «Минги тау» деген жыр бла къууандыргъанды. Жыйылыуну ахырында уа Гюзюйланы Тахирни, башхаланы да миллет байлыкъны сакъларгъа уллу къыйын салгъанлары ючюн сыйлы грамотала бла саугъалагъандыла.
Мен дюгерлиле бла къоншулукъда Ташлы-Талада жашайма. Башха жерледе ётген кёп тюрлю фестивальлагъа, байрамлагъа бара тургъанлыкъгъа, Шимал Осетия-Аланияда быллай байрамгъа уа биринчи кере къатышханма. Бизни миллетге адетлери, тёрелери бла алай жууукъ болгъанлагъа да тюбемегенме. Ол, айхай да, культура жаны бла бай республикады. Бизни Владикавказда Мариинский театрны бёлюмюне элтген эдиле, анда жыйырма тёрт эр кишиден къуралгъан хорларына сейир этгенме, аланы миллет жырлары, эжиуге усталыкълары аламат эди.
Дагъыда анда бизни тукъумлагъа тюбегениме къууаннганма, Цаколаны, Цораланы келечилери, бизни малкъарлыла болгъаныбызны билип, аллыбызгъа келип, Къабарты-Малкъардагъы тукъумла бла байламлыкъ жюрютюп тургъанларын да айтхандыла. Аны себепли бу фестиваль, керти да, миллетлени бирикдирип, аланы шуёхлукъ жюрютюулерине иги себеплик этгенди. Быллай магъаналы жыйылыула келлик заманда да къураллыкъларына ышанама, - дегенди Гюзюйланы Тахир ушагъыбызны кезиуюнде.
Темуккуланы Амина.
