«Къайсыннга жюз атлам» фондну башчысы Тетууланы Хадис къурагъан «Алтын къол» фестивальда узакъдан окъуна Ёлмезланы Земфираны кийизлерин эслеген эдим. Кёзге илиннген, ариу ишле.
Сиз бу жолгъа дери жаулукъла келтириучю эдигиз да фестивальгъа?
Хау, таулу тиширыуланы озгъан ёмюрледе башларына къысхан, дагъыда сыйлы кюнлеге деп кюбюрлеринде аягъан жаулукълары манга бек сейирдиле. Сурайма, излейме, битеу танышларым да биледиле аланы излегеними.
Жарсыугъа, эрттегили жаулукъланы кёбюсю кюйдюрюлгенди, атылгъанды. Келир жыл, Аллах айтса, «Алтын къол» кюбюрге аталлыкъды. Баям, адамла кёп сейир затла келтирлик болурла. Кюбюр кеси да сейирликди, алай аны ичинде асыралып тургъан затла уа андан да сейирдиле.
Хау, къумачла окъуна озгъан ёмюрню юсюнден кёп затланы айтадыла. Хар заманны кесини кийими, жаулукълары, ариулукъну юсюнден кесини ангылауу. Эрттегили жаулукъланы жыйгъан да, сатхан да этеме, ынналарыбыз жюрютген затла бюгюннгю жашауда да хайырланнганларына бек къууанама. Шёндю тюкенден алыннган бла кюбюрден чыгъарылгъан жаулукъланы ким да айырлыкъды.
Энди уа бу жол келтирген кийизлеригизни юсюнден айтайыкъ. Кимден юйреннгенсиз?
Огъары Басханнга Джаппуланы Езетханнга барып, кийизни хар тюрлюсю къалай этилгенине къарагъанма. Холстда суратла этеме, бир жерде да окъумагъанма, жюрегим итинип ишлейме. Жюн суратла этип кёрюрге сюйгенме да, Езетхандан бир къауум дерс алгъанма. Сау болсун, кёплени юйретеди. Бусагъатда холстда бояула бла этген суратларымы жюн бла этерге кюрешеме. Бек сейирди ишлеген.
Окъууну, билимни юсюнден айтханда, искусстволаны колледжлерин, академияларын бошагъанланы асламысы башха ишледе урунадыла, суратла этмейдиле. Сора дуниягъа аты айтылгъан Пиросманини алсакъ, аны да билими болмагъанды, алай ол окъумагъанлыкъгъа, искусствода бек белгили эм бек фахмулу адамладан бирине саналады.
Хар жаны болгъан адам бир затха итинеди, бир затха сейири болады. Мен чыгъармачылыкъ бла кюреширге сюеме. Машинамда окъуна къарасагъыз, багажнигимде жюн барды.
Кёрмючге хазырланамысыз?
Ишлерими асламысын сатып барама, туристлени сейирлери барды, манга да сурагъанлары хычыуун кёрюнеди. Алай сиз тюз айтасыз, баям, бир-бир кесим бюсюреген ишлени сайлап, сатмай, жыя турургъа керек болур.
Бу юйюню аллында тургъан тиширыуну суратларгъа къалай эсигизге келгенди?
Аны эски суратха къарап этгенме. Озгъан ёмюрледен къалгъан суратлагъа къарасанг, кёзюнгю алалмайса, ангылайса: адамла, ёмюрле бла бирге аланы дуниялары да кетеди, хар бирини къадары да тауусулады. Эсгериу сурат алай жаратылгъанды.
