Къабарты-Малкъарда туризм экономиканы къыйматлы бёлюмлеринден бирине саналады. Ол себепден жоллагъа энчи эс бурулады эмда «Къоркъуусуз эмда тынгылы автомобиль жолла» миллет проектге кёре къонакъла эм жерлешлерибиз да солургъа сюйген жерлеге къыйналмай барырча мадарла этиледиле. Чегем чучхурлагъа элтген «Экинчи Чегем-Булунгу» жол анга кёре айбат эмда къоркъуусуз болгъанды. Экинчи кере къайтып келген туристле окъуна иги жанына тюрлениулени белгилемей къоймайдыла. Алгъын жаяу жюрюгенле улоула да бир бирлерин чырмагъандыла. Энди уа энчи жолчукъла, тёгерек-башха къараучу жерле да къуралгъандыла.
Аны бла бирге а Чегем чучхурладан Эл-Тюбюне дери жолну 20 километр чакълы кесегинде тынгылы ремонт ишле барадыла. Ол къыйын жер болгъаны себепли, жолчула ишни 2026 жылгъа бошар муратлыдыла. Белгили «Флай Чегем» парадром да мында орналады. Тау бийикледе парапланлада учаргъа бирси регионладан аслам адам келеди.
Дагъыда «Прохладный Элбрус» А-158 жолну, «Нарзанла талагъа» баргъан 300 метр чакълы кесеги жангыртылгъанды. Ол болмагъанча сейир жерди. Мында бир бирни къатында къурамлары арталлыда башха болгъан гара суула чыгъадыла. Аллай зат жер юсюнде окъуна жокъду. Аны себепли дарман сууладан ичерге, саулукъларын кючлерге кюн сайын танг кесек турист келеди.
Ишлени кезиуюнде жангы асфальт салыннганды жауун суу саркъырча мадар этилгенди эм къоркъуусузлукъ жалчытылынырына да эс бурулгъанды. Жолну жаны бла темир буруула тартылгъандыла, жорукъланы билдирген белгиле эм ызла салыннгандыла. Солугъанлагъа таплыкъгъа улоула тохтагъан жерле да кёбейтилгендиле.
