«ПромРейтинг» хъыбарегъащIэ IэнатIэм иджыблагъэ иригъэкIуэкIа къэпщытэныгъэхэм къызэрагъэлъэгъуамкIэ, Урысей Федерацэм и щIыналъэхэм ящыщу зи автомобиль гъуэгу нэхъыбэ езыгъэфIэкIуауэ къалъытахэм Къэбэрдей-Балъкъэрыр яхыхьащ, етхуанэ увыпIэр иIыгъыу.
2014 - 2023 гъэхэм ди республикэм хузэфIэкIащ и автомобиль гъуэгухэр куэдкIэ нэхъыфI ищIыну, абыхэм яIэ ныкъусаныгъэхэм я нэхъыбэр игъэзэкIуэжыну, къэралми пашэныгъэр щиубыдыну. Апхуэдэ Iуэху бгъэдыхьэкIэм кърикIуэу а IэнатIэм щагъэувауэ къэралыр зытет мардэм къимытIасэхэм фIыуэ яхэщIащ, гъуэгухэм я шынагъуэншагъэми я нэIэ трагъэтащ.
Нобэрей ехъулIэныгъэм лъабжьэ хуэхъуар республикэм и гъуэгу инфраструктурэр къызэрагъэщIэрэщIэжам, ас-фальтыщIэхэр зэрытралъхьам и закъуэкъым, атIэ, гъуэгу лэжьыгъэхэм иджырей технологиехэр жыджэру къызэрыщагъэсэбэпари, Iуэху бгъэдыхьэкIэри, унафэ щIыкIэри хэтщ.
Псалъэм къыдэкIуэу, щIыналъэм и экономикэм и зыужьыныгъэм и IэужьыфIхэри ялъоIэс иджырей мардэм къитIасэу ирагъэфIакIуэ гъуэгу инфраструктурэхэм щIыналъэм и къалэхэмрэ жылэхэмрэ зэрызэпащIам, Къэбэрдей-Балъкъэрыр туристхэм я кIуапIэ зэрыхъуам, цIыхухэр нэхъ тыншу абы зэрыщызекIуэм.
ЗэрыгурыIуэгъуэщи, гъуэгум щызекIуэхэм я шынагъуэншагъэр къызэгъэпэщыныр мыхьэнэшхуэ зиIэ, япэ игъэщыпхъэ Iуэхугъуэхэм ящыщщ. Абы къыхэкIыу, а IэнатIэм и инфраструктурэр егъэфIэкIуэным, инвесторхэр а лэжьыгъэм жыджэру къыхэшэным гулъытэ хэха республикэм щыхуащI. Иджыпсту Къэбэрдей-Балъкъэрым къыпэ-щылъщ зыIэригъэхьа ехъулIэныгъэхэр къимыгъэлъахъшэу, лэжьыгъэхэм адэкIи пищэу, гъуэгу шынагъуэншэхэм я бжыгъэм къыхигъэхъуэну.
Фигу къэдгъэкIыжынщи, гъуэгу инфраструктурэр егъэфIэкIуэным ехьэлIауэ лъэпкъ пэхуэщIэхэм къыщыгъэлъэгъуахэр ягъэзэщIэн папщIэ сом мелард 47,5-м нэблагъэ къаутIыпщащ. Абы и нэхъыбэр - сом мелард 28-р - трагъэкIуэдэнущ гъуэгущIэхэр ухуэным, щыIэхэр зэгъэпэщыжыным. Илъэситху пIалъэм къриубыдэу автомобиль гъуэгуу километр 1000-м нэблагъэ зыхуей хуагъэзащ, километр 300-р иджырей уэздыгъэхэмкIэ къызэщIагъэблащ.
