«Егъэджэныгъэ» лъэпкъ пэхуэщIэм ипкъ иткIэ Къэбэрдей-Балъкъэрым и курыт еджапIэхэм я спортзалхэр къэгъэщIэрэщIэжыным, спорт утыкухэр щIыным ехьэлIа лэжьыгъэхэр жыджэру ирагъэкIуэкI. Псалъэм папщIэ, гъэ еджэгъуэщIэм ирихьэлIэу Налшык къалэм и школ-интернат №1-м щаIыгъ, зи узыншагъэм сэкъат иIэ цIыкIухэм папщIэ баскетбол, футбол, волейбол ущыджэгу хъуну щIыпIэхэр щаухуащ.

Дызэрыт илъэсым къриубыдэу Налшык, Прохладнэ къалэхэм я еджапIэхэм, школ-интернат №1-м, мэзылъэм хэт, санаторэм хуэдэу гъэпса школым къедзылIауэ, щIыбым удэту спортым зыщыхуэбгъасэ хъуну Iэмэпсымэхэмрэ ухуэныгъэхэмрэ щагъэувынущ. Абы нэмыщI, ди къалащхьэм дэт гимназие №14-мрэ Прохладнэм и курыт еджапIэ №11-мрэ я спортзалхэр иджырей мардэм къитIасэу зэрагъэпэщыжынущ.
Къыхэдгъэщынщи, «Егъэджэныгъэ» лъэпкъ пэхуэщIэм хиубыдэу Къэбэрдей-Балъкъэрым щрагъэкIуэкI лэжьыгъэхэ р курыт еджапIэхэм я спортзалхэр къызэгъэпэщыжыным и закъуэкъым зыхуэгъэпсар, атIэ абы къызэщIеубыдэ сабийхэр узыншэу псэуным, спортым ахэр дегъэхьэхыным ехьэлIа егъэджэныгъэ программэхэри. ИкIи шэч хэлъкъым апхуэдэ Iуэху бгъэдыхьэкIэм еджакIуэ цIыкIухэм фIы куэд къазэрыхуихьынум, я узыншагъэри нэхъ быдэ зэрищIынум.
Фигу къэдгъэкIыжынщи, «Егъэджэныгъэ» лъэпкъ пэхуэщIэм и фIыгъэкIэ республикэм и курыт еджапIэхэм я спортзалу 78-рэ къызыхуэтыншэу зэрагъэпэщыжащ иужьрей илъэситхум.