УФ-м и цIыхубэ артист Соколов Андрей ЩоджэнцIыкIу Алий и цIэр зезыхьэ Къэбэрдей къэрал драмэ театрым щаIущIащ КъБР-м ЩэнхабзэмкIэ и министерствэм и унафэщIхэм, театрым и артистхэм, «Бродвей» щIалэгъуалэ театр студием хэтхэм.
КъБР-м щэнхабзэмкIэ и министрым и къуэдзэ Карчаевэ Iэминэ хэгъэрейхэм хьэщIэр щаригъэцIыхум къыхигъэщащ щIыналъэм исхэм артистыр зэралъагъур, абы и лэжьыгъэщIэхэм зэрыпэплъэр.
Соколов Андрей зэIущIэм зыкърезыгъэхьэлIахэм фIэхъус яриха нэужь, жиIащ Къэбэрдей-Балъкъэрым илъэс 15 и пэкIэ къэкIуауэ зэрыщытар, КъБР-м щэнхабзэмкIэ и министр Къумахуэ Мухьэдинрэ абырэ Щукиным и цIэр зезыхьэ театр институтым и актёр факультетым зэрыщызэдеджар икIи абы лъандэрэ зэрызэныбжьэгъур.
- Къэбэрдей-Балъкъэрым теухуауэ щIэ гуэр къэсщIэхукIэ, иджыри нэхъыбэ зэрызэзгъэщIэным сыхущIокъу. Режиссёр IэщIагъэм сызэрыхуеджэжам и фIыгъэкIэ щIэ куэд къэсщIащ! - жиIащ Соколовым. - Ар щIыжысIэращи, щIалэгъуалэм фи щIэныгъэм зэрыхэвгъэхъуэным сыт щыгъуи фыхущIэкъу. Уи гъащIэ псокIэ уи щIэныгъэм хэбгъэхъуэфынущ. Студентыгъуэ зэманыр псом нэхърэ нэхъыфIщ. Зэманыр пщIэншэу фымыгъэкIуэд. Феджэ, феджэ, иджыри феджэ! Фи IэщIагъэм а псор къызэрыщыфхуэщхьэпэжынур зыщывмыгъэгъупщэ. ФхуэмыгъэзэщIэну къэфлъытэ къалэнхэр зыхуэвгъэувыж фымышынэу. Ахэр зэвгъэхъулIэфынущ! ЦIыхум зиужьыху, и гупсысэкIэми зехъуэж. Фи зэхуаку дэлъ зэныбжьэгъугъэр фи гъащIэ псокIэ зэрыфхъумэным иужь фит. ГъащIэм и мыхьэнэр ар езы гъащIэрщ!
Соколов Андрей къытеувыIащ «Артек» сабий зыгъэпсэхупIэм щекIуэкI, езыр зи вице-президент «Алые паруса» фестивалым щызэфIих лэжьыгъэм. Иджырей щIалэгъуалэр зыгуэрым дегъэхьэхыгъуейуэ жаIэми, ар зэрымыпэжым и щапхъэу къихьащ ныбжьыщIэхэм гулъытэ яхуэщIын, ахэр унэтIын, я зэфIэкIхэр къызэкъуахынымкIэ ядэIэпыкъун зэрыхуейр.
Артистыр гъащIэм зыхуригъэджам щIалэгъуалэр щыщIэупщIэм, абы и жэуапу итащ, япэрауэ, щIэныгъэ зэгъэгъуэтын зэрыхуейр, жиIэмрэ IуэхущIафэу иIэхэмкIэ цIыхум жэуап зэрихьыпхъэр. ЕтIуанэрауэ, ерыщу умылажьэмэ, ехъулIэныгъэм и IэфIыр зэрызыхыумыщIэнур зыщыбгъэгъупщэ зэрымыхъунур. Къыпэщылъ лэжьыгъэхэм я гугъу щищIым, къыхигъэщащ фильмитIым я Iуэху зэрызэрихуэр. Зыдэлэжьа, фIыуэ илъагъу режиссёрхэм ящыщу я цIэ къриIуащ Мотыль Владимир, Рязанов Эльдар, Пичул Василий сымэ икIи къыхигъэщащ абыхэм ящыщ дэтхэнэ зыми Iуэху бгъэдыхьэкIэ, дуней лъагъукIэ зэраIэжыр.
