Къэбэрдей-Балъкъэрым и Правительствэм и УнафэщI Мусуков Алий видео зэпыщIэныгъэ Iэмалхэр къигъэсэбэпу иджыблагъэ иригъэкIуэкIащ республикэм и гъэзэщIакIуэ орган нэхъыщхьэм и зэIущIэ. Абы щыхэплъащ Iуэхугъуэ пщыкIутхум хуэдизым. Унафэ къащтащ республикэм и къалэхэм я зэхуакум щызекIуэ гъущI гъуэгу транспортымкIэ къэзыкIухь школакIуэхэм, еджапIэ нэхъыщхьэхэмрэ колледжхэмрэ махуэрыеджэу щIэсхэм ят гъуэгупщIэм и процент 50-р гъэ еджэгъуэр и кIэм нэсыху худачыхыну. Абы нэмыщI, Къэбэрдей-Балъкъэрым и Правительствэм и Унафэр ягъэзащIэу, арэзы техъуащ 2025 гъэм Налшык къа-лэ округым и муниципальнэ гъуэгу фондыр зэхэгъэувэным субсидиеу сом мелард 1,2-рэ хухахыну, езы муниципалитетым и ахъшэу абы сом мелуани 120-рэ хыхьэнущ. КъБР-м Узыншагъэр хъумэнымкIэ и министерствэм къыхилъхьащ къэралым и медицинэ IэнатIэхэм дзэ протезхэр щрагъэщIкIэ (гъущI лъапIэхэм къыхэщIыкIахэмрэ металлокерамикэмрэ хэмыту) е ахэр щызэрагъэпэщыжкIэ абы щIатыну пщIэм ехьэлIауэ льготэ зиIэхэм хагъэхьэну дзэ Iуэху хэхам хэтхэр, я къулыкъур ирахьэкIыу зи узыншагъэм сэкъат игъуэтахэр, икIи а Iуэхутхьэбзэхэм щхьэкIэ абыхэм пщIэ щIатынукъым. ЗэIущIэм хэтахэр арэзы техъуащ КъБР-м СпортымкIэ и министерствэм къыхилъхьа проектми. Ар хуэгъэпсащ дызэрыт илъэсым и етIуанэ мазищым къриубыдэу спорт зэхьэзэхуэ зэхуэмыдэхэм къыщыхэжаныкIа спортсменхэмрэ тренерхэмрэ ахъшэкIэ гъэпажэным. Абыхэм ящыщщ Олимп джэгухэм хыхьэ, Олимп джэгухэм хэмыхьэ спорт лIэужьыгъуэхэм зыкъыщызыгъэлъагъуэхэр, паралимпийцхэр. Псори зэхэту абы хагъэхьащ Олимп джэгухэм хыхьэ спорт лIэужьыгъуэхэм щытекIуауэ, призер щыхъуауэ цIыху 32-рэ, Олимп джэгухэм хэмыхьэ спорт лIэужьыгъуэхэмкIэ - 47-рэ, паралимпийскэ зэхьэзэхуэхэм къыщыхэжаныкIауэ тIу. Апхуэдэуи даIыгъащ «Спартак-Налшык» футбол командэм ират ахъшэ дэIэпыкъуныгъэр нэхъыбэ щIыным теухуауэ КъБР-м СпортымкIэ и министерствэм къыхилъхьа лъэIури. КъБР-м и Правительствэм и УнафэкIэ зэхъуэкIыныгъэхэр ягъуэтащ республикэм СпортымкIэ, Егъэджэныгъэмрэ щIэныгъэмкIэ и министерствэхэм я положенэм: 2024 - 2028 гъэхэм УФ-м терроризм идеологием щыпэщIэтыным ехьэлIауэ комплекснэ планхэм елэжьын икIи зэхагъэувэн хуейщ абыхэм. АдэкIэ зэIущIэм щыхэплъащ КъБР-м Курортхэмрэ туризмэмкIэ и министерствэм къыхилъхьа планым: туризмэм щIыналъэм зыщегъэужьыным ехьэлIауэ республикэм щекIуэкIа зэхьэзэхуэхэм къарикIуахэр къащтэным хуэгъэпсам икIи абы арэзы техъуахэщ. Апхуэдэуи Налшык къалэм щрагъэкIуэкIыну ерыскъыхэкIхэм, удз гъэгъахэм я фестивалхэр къызэгъэпэщы- ным щIыпIэ администрацэм ахъшэ хухихынущ. ЗэIущIэм и кIэм унафэ къащтащ щытыкIэ гугъум ихуа унагъуэ зыбжанэм я лъэIухэр ягъэзащIэу, зэ тыгъуэу ахъшэкIэ зыщIагъэкъуэну. ХЬЭЩЫКЪУЕЙ Олег.