Тюнене жигитлерибизге – энчи аскер операциягъа къатышханлагъа гуманитар болушлукъ тапдырыу жаны бла ишге тири къошулгъан, аланы юйюрлерине себеплик этген Къабарты-Малкъарда жашагъан инсанланы саугъалау болгъанды. КъМР-ни Башчысы Казбек Коков тири инсан кёз къарамлары ючюн волонтёрларыбызгъа Къабарты-Малкъар Республиканы Башчысыны Ыразылыкъ къагъытларын бергенди.

Андан сора да, 58-чи гвардиялы битеулю войскаланы армиясыны таматаларындан жыйылыугъа къатышханлагъа «Инсан батырлыкъ ючюн» деген эсде къаллыкъ сыйлы саугъаланы тутдургъанды. Ол саугъа къоруулауну эм хазырлыкъны кючлегенлери эмда энчи аскер операциягъа къатышхан бёлюмлеге гуманитар болушлукъ жарашдыргъанлары эмда жибергенлери ючюн бериледи.
70-ден артыкъ саугъаланнганланы араларында уллу кёллюлюк этмеген адамла, волонтёр биригиулени, жамауат организацияланы келечилери, аскерчилени тенглери бла жууукълары, предпринимательле, къырал эм муниципал организацияланы ишчилери, устазла, врачла, спортчула болгъандыла. Ала бары да кеслери ыразылыкълары бла жандауурлукъ халда тохтамагъанлай аскерчилерибизге болушханлай турадыла.
Республикада жашагъанла фронтха жюз тоннала бла гуманитар жюкле, сухпаёкла, букъдуруу аула, кеслери къоллары бла жарашдыргъан окоп жау чыракъла жибередиле. #БИЗ БИРГЕБИЗ регион штаб да ишин тохтатмай, СВО-гъа къатышханлагъа эс тапдыргъанлай турады. Жамауат организацияладан жаш адамла, бирде батырлыкъларын кёргюзтюп, фронтну ал сатырларына гуманитар жюклени жетдиргендиле. Ол уллу эмда къыйматлы ишди, барыбызны да бирлешдирген эмда Хорламыбызны жууукълашдыргъан.
Ол патриот ызны тутханла, бийик граждан жууаплылыкълары болгъанла эмда Ата журтну къоруулаугъа юлюш къошханла – бары да ыспасха тийишлидиле. «Ата журтубузну эмда аны тамблагъы кюнюн жигитлеча къоруулагъанлагъа мындан арысында да болушханлай турлукъбуз», – дегенди регионну таматасы кесини телеграм-каналында.