КъМР-ни Башчысы Казбек Коков  республиканы районларына ишчи жолоучулугъун башлагъанды эмда алада билим бериу, маданият, саулукъ сакълау, инфраструктура жаны бла да миллет проектлени толтуруу не халда болгъаны бла шагъырейленирикди.
Жолда бара, республиканы оноучусу  Аргудан — Александровская жолну жангыртыу къалай баргъанына къарагъанды. Бу объект РФ-ни Президенти Владимир Путинни оноуу бла башланнган «Къоркъуусуз эмда тынгылы жолла» миллет проектге кёре тапландырыла тургъанладан бириди, кеси да эм уллугъа бла эм магъаналыгъа саналады. Жамауатдан ол жолну тап халгъа  келтирирге кереклисине КъМР-ни Башчысыны эсин бургъанды эмда бу ишге болушурун тилегенди.
Бу жол Россейни магъаналы автомобиль жолларыны тизмесине киреди, аны узунлугъу 16 километрден артыкъды. Ол республиканы 4 муниципал районун байлашдырады – Лескен, Урван, Терк, Майский. Аны себепли анга уллу ауурлукъ жетеди. Аны тапландырыуда жолчула шёндюгю амалланы бла кереклени хайырланадыла, ала бютюн тутхучлудула эмда ышаннгылыдыла.
Жолгъа ремонт этиу экиге бёлюнюп бардырылады. Биринчи кесеги Арамисов атлы орам элни ичиндеди. Аны узунлугъу 4,3 километрди. Аны кёп да бармай хайырланыргъа берликдиле. Экинчиси Аргуданны бла Александровканы арасындады (12 километр). Бюгюнлюкде аны асфальт салыргъа хазырлай турадыла. Жол тёртызлыкълы боллукъду эмда къоркъуусузлукъну кючлер муратда ортасы да бегитилликди, деп билдиргендиле КъМР-ни Башчысыны бла Правительствосуну пресс-службасындан.