Республикабызны ара шахары тарых магъаналы эсгертмелеге байды. Аладан бири Шортанов атлы орамда Къоз терек паркны аллында Ата журт ючюн жанларын берген комсомолчуланы эсгертмелериди, быйыл анга 55 жыл толады. Аны тарыхы озгъан ёмюрню 60-чы жылларында башланады, ол кезиуде Жаш тёлюню битеусоюз ленинчи коммунист союзуну 50-жыллыгъын белгилеуню чегинде Нальчик ючюн сермешледе ёлген комсомолчулагъа эсгертме ишлерге буйрукъ берилген эди. Аны къурулушуна ахча жыйыу да тири бардырылгъанды, субботникле бла воскресникле къуралгъандыла. Бу жумушха жамауат да къатышханды, анга ахча ётдюргенлеге уа аны юсюнден шагъатлыкъ къагъытла берилгендиле.

Башын энишге ийип, къолун жюрегине къысхан эсгертмени автору скульптор, СССР-ни хужожниклерини союзуну келечиси Гид Бжеумыховду, конкурсда аны проекти хорлагъан эди. Жаш адамны сыфатындан сора, анда юч мюйюшлю стелла да турады, анда бийикге учаргъа хазыр тиширыу кёрюнеди. Композицияны арасында уа терен сагъышха кетген адам бет барды, аны ишлегенде сары, моргъул эм къарамды кёксюл тюрсюнле хайырланылгъандыла. Ленинчи премияны лауреаты Лев Кербель артда бу эсгертме ишленнгенини, сыфатларына кёре Шимал Кавказда энчи болгъанын айтхан эди.

Эсгертмени ачханда къыралны битеу кинотеатрларында «Фантомас» фильм кёргюзтюле эди, аны баш жигитин шахарчыла, нек эсе да, Комсомолчугъа ушашдырып, халкъда анга Фантомас деген ат аталып къалгъанды.

Кульчаланы Зульфия.