УФ-м щIыхь зиIэ и сурэтыщI, КъБР-м и цIыхубэ художник, ХудожествэхэмкIэ Урысей Академием хэт, Санкт-Петербург щыпсэу икIи щылажьэ ди хэкуэгъу сурэтыщI, скульптор цIэрыIуэ СэвкIуий Хьэмид Къулъкъужын Ищхъэрэм Къып Мухьэмэд и цIэр зезыхьэ ГъуазджэхэмкIэ и еджапIэм бадзэуэгъуэм и 25-м сабийхэм щаIущIащ икIи «Клаузура образ ветра» дерс щIэщыгъуэр яритащ. Ар къызэрагъэпэщащ художникым и ныбжьыр илъэс 60 зэрырикъум и щIыхькIэ.

ГъуазджэхэмкIэ сабий школым и унафэщI КIуж Ритэ, еджапIэм и лэжьакIуэхэм, лъэпкъ фащэхэр зыщыгъ я гъэсэнхэм лъэпкъ шхыныгъуэхэр яIыгъыу, адыгэ макъамэм щIэту, КъБР-м и цIыхубэ сурэтыщI Бгъэжьнокъуэ Заурбэчрэ СэвкIуий Хьэмидрэ гуапэу пежьащ.

Хьэмид сурэт щIынымкIэ дерс гъэщIэгъуэн итащ. Абы ищIащ лъэпкъ фащэ зыщыгъ нэхъыжьым и теплъэр. СэвкIуийм дзэху ложкэхэм къыхибзыкIри, сурэтыщI ныбжьыщIэхэм яригъэлъэгъуащ адыгэхэм я лъэпкъ тхыпхъэр – тхьэмпищыр. НыбжьыщIэхэм дерсыр щIэщыгъуэ зэращыхъуам шэч хэлъкъым. Езыхэми сурэтыщIым и IэдакъэщIэкIым тращIыкIащ. ЕджакIуэхэр щагъэгъуэзащ СэвкIуий Хьэмид и гъащIэмрэ гуащIэмрэ.

Уасэ зимыIэщ ныбжьыщIэхэм мы махуэм зэхахамрэ ялъэгъуамрэ.

ТЕКIУЖЬ Заретэ.