Еджэным зи гур хузэIуха, ехъулIэныгъэщIэхэм хуэпабгъэ ныбжьыщIэхэм я бжыгъэм кIуэ пэтми къахохъуэ. ЩIэх-щIэхыурэ зэфIэкI лъагэхэр зиIэ щIалэгъуалэм я хъыбарыфIхэр зэхыдох. Иджыблагъэ Налшык дэт Музыкэ театрым щекIуэкIащ КIуэкIуэ В.М. и цIэр зезыхьэ, Къэбэрдей-Балъкъэр къэрал мэкъумэш университетыр ехъулIэныгъэкIэ къэзыуха ныбжьыщIэхэм я диплом плъыжьхэр щратыж зэхыхьэ гуапэ. Мы гъэм а еджапIэм къыщIигъэкIащ ныбжьыщIэ 730-рэ, абы щыщу 168-м диплом плъыжьхэр къахьащ.
ЕхъулIэныгъэкIэ еджапIэр къэзыухахэм псалъэ гуапэкIэ захуигъэзащ КъБКъМУ-м и ректор Апажэ Аслъэн. Абы фIыщIэ яхуищIащ ныбжьыщIэхэм, зэфIэкI лъагэхэр зэрызыIэрагъэхьам, адэ-анэхэмрэ егъэджакIуэхэмрэ щIалэгъуалэр гъэсэным, щIэныгъэ ябгъэдэлъхьэным хуэунэтIауэ лэжьыгъэ купщIафIэ зэрырагъэкIуэкIам папщIэ. 
- Ди университетыр мэкъумэш хозяйствэмкIэ щыIэ еджапIэ нэхъыфIхэм хабжэ. Абы и гъэсэнхэм ди республикэм и мызакъуэу, нэгъуэщI щIыналъэхэми щIэупщIэ щаIэщ, - жиIащ Апажэм. - 2023 гъэм еджапIэр къэзыухахэм я процент 87-м Къэбэрдей-Балъкъэрми ди къэралым и нэгъуэщI хэгъэгухэми щыIэ IуэхущIапIэ пэрытхэм лэжьыгъэ IэнатIэ къыщагъуэтащ. Ар и щыхьэтщ ди университетым и зэфIэкIыр къэралым къызэрыщалъытэм. Апхуэдэу еджапIэр сэбэп яхуохъу ар къэзыуххэм лэжьапIэ къахуэгъуэтынымкIи - а Iуэхум хуэунэтIауэ центр щхьэхуэ диIэщ. Ди еджапIэр къэзыуха куэдым ехъулIэныгъэхэр яIэу республикэми къэралым и щIыпIэ зэхуэмыдэхэми IэнатIэфIхэр щрахьэкI, абыхэм мымащIэу яхэтщ къулыкъущIэхэр, я лэжьыгъэ зехьэкIэм къыпэкIуэу дамыгъэ лъапIэхэр зыхуагъэфэщахэр. Сэ шэч къытесхьэркъым нобэ еджапIэр къызыух ныбжьыщIэхэри мэкъумэш университетым и тхыдэм фIыкIэ фыкъызэрыхэнам къищынэмыщIауэ, республикэми и цIэр фIыкIэ вгъэIуу абы и жылагъуэ гъащIэм жыджэру фызэрыхэтынум. ЕджапIэм фызэрыщIэса зэманым фIым я фIыжу зыкъэвгъэлъагъуэу фи пщэрылъхэр вгъэзэщIащ, адэкIи узыншагъэ, зэIузэпэщыгъэ, ехъулIэныгъэ фиIэу, фи Iэзагъэм хэвгъахъуэу фи гъуэгум фрикIуэну сынывохъуэхъу. 
КъБР-м и Правительствэм и УнафэщIым и къуэдзэ Хъубий Марат къыхигъэщащ Къэбэрдей-Балъкъэр къэрал мэкъумэш университетыр республикэр, лъэпкъыр зэрыгушхуэн цIыху щэджащэ куэдым гъащIэм щыхаша гъуэгуанэ бгъуфIэм къежьапIэ зэрахуэхъуар, нобэрей ныбжьыщIэхэми абыхэм я лъэужьым ирикIуэнухэр мымащIэу къазэрыхэкIынуми шэч къызэрытримыхьэр.
- Балигъ гъащIэм и зы Iыхьэ къызэвнэкIащ, жэщкIэрэ фыщымыжей къыфхуихуэу, щхьэх фымыщIэу щIэныгъэ зэрызэвгъэгъуэтынум яужь фитащ, нобэ къыватыж дэфтэр тхылъым фызэрыхуэфащэр къэвгъэлъагъуэу, - жиIащ Хъубийм. - Дауи, адэкIэ фызыпэрыувэну IэнатIэми ехъулIэныгъэхэр зырыщызыIэрывгъэхьэнум фыхущIэкъуу фи зэфIэкI псори Iуэхум ефхьэлIэнущ. Лэжьыгъэ фызыпэртым фыдихьэхмэ, фIыуэ хэфщIыкIмэ, абы лъагапIэщIэхэм фыхуишэнущ. Гушхуэныгъэ къыпхэзылъхьэ Iуэхум насып къыдокIуэ. Мис ар зыщывмыгъэгъупщэ IэнатIэм фыщыпэрыувэкIэ. Дэтхэнэми фи мурад къывэхъулIэну сынывохъуэхъу. Щхьэхуэу захуэзгъэзэну сыхуейт ныбжьыщIэхэр еджэным драгъэхьэхыу, трагъэгушхуэу абыхэм яхэта егъэджакIуэ гупми. ЩIэблэр егъэджэнымкIэ, IэщIагъэлI нэсхэр гъэхьэзырынымкIэ лэжьыгъэшхуэ ивогъэкIуэкIри, абы и хъер флъагъуу фи IэнатIэр адэкIи ефхьэкIыну си гуапэщ.
- Нобэ мы утыкум щагъэлъапIэхэр мурад зыхуагъэувыжам ерыщу хуэкIуэфахэрщ - диплом плъыжьыр я плъапIэти, ар зыIэрагъэхьэфащ, - жиIащ КъБР-м и Парламентым и УнафэщIым и къуэдзэ Жанатаев Сэлим. - Апхуэдэ щIэдзапIэ дахэ зиIэ ныбжьыщIэхэм нэхъыбэжи зрагъэхъулIэфынущи, мурадыфI куэдкIэ дащогугъ. НыбжьыщIэхэм сынывохъуэхъу республикэм, Хэкум яхуэщхьэпэн IуэхуфIхэр фи бащэу, фи гъуэгур нэхурэ махуэу фи гъащIэр ефхьэкIыну.
Апхуэдэу ныбжьыщIэхэм, егъэджакIуэхэм, адэ-анэхэм псалъэ гуапэкIэ зыхуагъэзащ КъБР-м и Парламентым Мэкъумэш IуэхухэмкIэ, щIыуэпсыр къэгъэсэбэпынымрэ дыкъэзыухъуреихь дунейр хъумэнымкIэ и комитетым и унафэщI ТекIушэ Артуррэ республикэм лэжьыгъэмрэ цIыхухэм социальнэу къащхьэщыжынымкIэ и министр Асанов Алимрэ. Абыхэм къыхагъэщащ еджэным зэфIэкI хъарзынэхэр къыщызыгъэлъэгъуа ныбжьыщIэхэр адэкIэ къапэщылъ сыт хуэдэ Iуэхуми жэуаплыныгъэ пылъу зэрыбгъэдыхьэнум, зыпэрыхьэ дэтхэнэ лэжьыгъэри нэгъэсауэ зэрызэфIахынум шэч къызэрытрамыхьэр.
 

ЩХЬЭЩЭМЫЩI Изэ.