Республикабызда табийгъат къыйын болумланы кёбюсю чыгъарына къоркъуу не заманда да барды. Халны эсепде тутар муратда МЧС-ни МИ-8 вертолётунда ведомствону регионда Баш управлениясыны келечилери, табийгъат байлыкъла эм экология министр бла Бийик тау геофизика институтну келечилери бийикликден таулада – Басхан, Чегем ауузлада, Джылы-Сууда бла Малканы огъарысында - болумгъа къарагъандыла.

Энчи эс ала чыранлада жыйылгъан кёлледен баргъан сууланы тинтиуге бёлгендиле, нек дегенде ол кёлле толуп, суу жагъаладан чыкъса, ырхыла келирге боллукъдула. МЧС-ни Баш управлениясыны таматасыны орунбасары Аналаны Мухаммат айтханыча, бусагъатда иссилик кёп заманны ичинде тургъаны ючюн ала къыстау эрийдиле. «Жауунла бек жаумасала, къыйын болум чыкъмазына ышанырчады. Алай сакъ жауунла кёп болсала, суула кётюрюллюкдюле. Республикада жашагъанлагъа, солургъа келгенлеге да ол иги тюйюлдю. Бусагъатда халны юсюнден айтханда, къоркъургъа сылтау жокъду. Алай таула дайым да сакълыкъны излейдиле, аны унутмазгъа керекди», - дегенди ол.

Тинтиулени эсеплерине кёре ырхыла бл жер юзюлген болмаз ючюн неда аланы хаталарын азайтырча эсгертиуле жарашдырыллыкъдыла.

Кульчаланы Зульфия.