Гу узыфэхэм щеIэзэ диспансерымрэ Къалэ клиникэ сымаджэщ №1-мрэ зэхагъэхьэжри, ФIагъышхуэ зиIэ медицинэ технологиехэмкIэ унэтIы­ныгъэ куэду зэхэт клиникэ республикэ центрыр къэунэхуащ. Апхуэдэ Iуэху бгъэдыхьэкIэм Iэмал къаритынущ узыфэ зэмылIэужьыгъуэ куэд къахутэнымкIэ, ахэр зыпкърытхэм тэмэму еIэзэнымкIэ. 

Къалэ клиникэ сымаджэщ №1-м лъынтхуэ узы­фэхэм я къежьапIэм ще­Iэзэ къудамэр дяпэкIэ Кардиодиспансерым щылэ­жьэнущ. Абы ягъэкIуэнущ гу-лъынтхуэ узыфэхэр, инсультым и нэщэнэхэр зиIэ сымаджэхэр. Мы IуэхущIапIэм операцэхэр щегъэ­кIуэкIыным хуэщIауэ къы­щызэрагъэпэщ етIуанэ пэш. Ар сыт и лъэныкъуэ­кIи зэпэщ ящIа нэужь, «Узыншагъэр хъумэн» лъэпкъ проектымкIэ къащэхуа ангиограф Iэмэ­псымэщIэр щIагъэувэнущ. Абы и фIыгъэкIэ рентген кIэлъыплъыныгъэм щIэту операцэ нэхъыбэ ирагъэкIуэкIыфынущ. ЕтIуанэ операцэ пэшыр къыщIы­зэрагъэпэщым и щхьэусыгъуэр рентгенэндоваскулярнэ IэмалхэмкIэ зэIэзэн хуей сымаджэхэр чэзум пэмыплъэу нэхъ псынщIэу зыхуэныкъуэ дэIэпыкъуныгъэхэр ягъуэтын папщIэщ. ИрагъэкIуэкI зэхъуэкIыныгъэхэм я фIыгъэ­кIэ сымаджэхэм хуащIэ медицинэ Iуэхутхьэбзэхэм къыхагъэхъуэнущ. Апхуэ­дэу щхьэ куцIым щызекIуэ лъым и щытыкIэр тэмэм щIыжы­ным хуэунэтIа Iэзэгъуэ­щIэхэр къагъэсэбэпын щIа­дзэнущ, лъынтхуэхэм епха операцэ зэхэтхэр щрагъэкIуэкIынущ.
Иджы Къалэ клиникэ сымаджэщ №1-м щIэлъхэм я гум и щытыкIэр къахутэну, дагъуэ гуэр иIэу къы­щIэкIмэ, и чэзум зыхуэныкъуэ Iэзэгъуэ ягъуэтыну хэкIыпIэ хъарзынэхэр яIэ хъуащ, апхуэдэ дыдэу Кардиодиспансерым щыIэхэми унэтIыныгъэ зэхуэмы­дэхэмкIэ лажьэ дохутырхэр я узыншагъэм кIэлъагъэплъыфынущ. IэнатIитIым я IэщIагъэлIхэр зэрызэдэлэжьэнур икъукIэ щхьэпэ хъунущ Къэбэрдей-Балъкъэр Республикэм и цIыхухэм ират медицинэ дэIэпыкъуныгъэхэм я фIагъым хэгъэхъуэнымкIэ.
- Республикэм и Правительствэм къидигъэкIа уна­фэм ипкъ иткIэ, щIыналъэм и цIыхухэм хуащIэ медицинэ Iуэхутхьэбзэхэм зрагъэубгъун папщIэ, Iуэху­щIапIитI зэхагъэхьэжащ - Гу узыфэхэм щеIэзэ диспансерымрэ Къалэ клиникэ сымаджэщ №1-мрэ, - жиIащ ФIагъышхуэ зиIэ медицинэ технологиехэмкIэ унэтIыныгъэ куэду зэхэт клиникэ республикэ центрым и дохутыр нэхъыщхьэм и къалэнхэр зыгъэзащIэ Дохъушокъуэ Герман. - Гу узыфэ лIэу­жьы­гъуэ гуэр фIэкIа зимыIэ сымаджэ щыIэкъым. Абы сытым дежи къыдо­гъуэгурыкIуэ нэгъуэщI уз зэмылIэужьыгъуэхэр. Абы ипкъ иткIэ IуэхущIапIитIым щекIуэкI зэхъуэкIыныгъэхэр сэбэп хъунущ сымаджэм и узыншагъэр унэ­тIыныгъэ зыбжанэкIэ къэ­хутэнымкIэ. Апхуэдэ щIы­кIэкIэ центрым къе­кIуа-­лIэ­хэм я узыншагъэр лъэ­ныкъуэ куэдкIэ къапщы­тэфынущ икIи мыбдеж зыхуэныкъуэ Iэзэгъуэр щагъуэтыфынущ.

ЩХЬЭЩЭМЫЩI  Изэ.