КъБР-м и Iэтащхьэ КIуэкIуэ Казбек я щхьэ IуэхукIэ зыкъыхуэзыгъэзахэм яIущIащ.

ЩIэгъэкъуэн, гулъытэ хуэныкъуэхэм ящыщт дзэ Iуэху хэхам хэту къулыкъур езыхьэкIхэм я унагъуэ­хэр. Ахэр Iуэхугъуэ зэмылIэужьы­гъуэхэмкIэ дэIэпыкъуэгъу хуейт, фIагъышхуэ зиIэ медицинэ Iуэху­тхьэбзэхэр къыхуащIэнри хэту. Зыкъыхуэзыгъэзахэм яхэтщ щытыкIэ хьэлъэм къихута бынунагъуэшхуи.
КIуэкIуэ Казбек жиIащ дэтхэнэ зыми зэрахузэфIэкIкIэ зэ­ры­зы­щIа­гъэкъуэнур.
* * *
Республикэм и Iэтащхьэр я щхьэ IуэхукIэ зыкъыхуэзыгъазэхэм зэра­Iу­щIэм къищынэмыщIауэ, тхьэмахуэ къэс зыщегъэгъуазэ жылагъуэ, интернет-егъэблэгъапIэхэм къагъэхь лъэIухэми.
«ЩIыналъэхэм Iуэхухэр щызегъэкIуэнымкIэ управленэм жыджэ­ру дызэрыдэлажьэм и фIыгъэкIэ интернетым щыIэ социальнэ напэкIуэцIхэмкIэ, хъыбарегъащIэ Iэмал зэхуэмыдэхэмкIэ цIыхухэм зэ­рызыкъытхуагъазэхэм, яIэ гукъеуэхэм дыщыгъуазэщ, зэрыхъукIи жэуапхэр ядотыж. Ар ди лэжьыгъэм гулъытэ нэхъ зыщыхуэтщI унэтIыныгъэхэм ящыщщ. ЦIыхухэр зыгъэгумэщI Iуэхухэр зэфIэхыным министерствэхэм, ведомствэхэм, щIыпIэ самоуправленэхэм я уна­фэщIхэр къыхыдошэ», - жиIащ КIуэкIуэ Казбек.
Апхуэдэу цIыхухэм ­къагъэув Iуэху­хэм ятеухуауэ щIыналъэм и Iэтащхьэр яхуэзащ Налшык къалэ администрацэм и унафэщI Ахъуэхъу Таймуразрэ КъБР-м узыншагъэр хъумэнымкIэ и министрым и къуэ­дзэ Къармэ Маратрэ. ЗэIущIэм щыхэплъащ цIыхухэм фIагъышхуэ зиIэ медицинэ Iуэхутхьэбзэхэр яхуэщIэным, псэупIэ къыщащэхукIэ я хуитыныгъэхэр хъума ­хъуным ­епха упщIэхэм.
КIуэкIуэ Казбек республикэм и цIыхухэм зэрызыкъыхуагъэзахэм япкъ иткIэ дэтхэнэми зыхуэныкъуэ дэIэпыкъуныгъэхэр хабзэм тету ху­зэфIагъэкIыну пщэрылъ ящи­щIащ.