Приэльбрусьеде квадроциклледе тёрели жай экспедиция бардырылгъанды, ол внедорожникледе «Россейни хазнасы» краеведение проектни чегинде къуралгъанды, аны жолун а Орус география обществону келечиси белгили краевед Мокъаланы Тенгиз жарашдыргъанды. Сейир жолоучулукъгъа Москвадан эм Брянск областьдан внедорожниклени сюйгенле къатышхандыла.
Жолоучула Къабарты-Малкъарны таулу жерлери бла ётгендиле, Черек, Чегем, Холам-Бызынгы ауузлада, Элбрусда, Хумаланда, Думала эм Акъ-Топуракъ ауушда болгъандыла. Жомакълы табийгъатны, тарых эсгертмелени кёргендиле, миллет ашарыкъладан да татхандыла. «Веломоторс» компанияны келечилери уа «Stels Guepard 800» ата журтлу жангы квадроциклни да сынагъандыла. Организацияны башчысы Юрий Начёвкин а ала Орус география общество бла байламлыкъланы дайым жюрютгенлерин, Россейни регионларында экология, табийгъатны сакълау эм тарых-маданият проектлени тамамлаугъа тири къатышханларын айтханды.
- «Россейни хазнасы» проектге быйыл биринчи кере къатышабыз. Ара Кавказны сейир ариу жерлерин кёргенбиз, республиканы тарыхыны, маданиятыны, географиясыны юсюнден кёп жангы зат билгенбиз. Сора, тау жоллада заводубузну ёхтемлиги «Stels Guepard 800» квадроциклни сынаргъа онг чыкъгъанына да бек къууаннганбыз. Экспедицияны эсеплерине кёре, инженерлерибиз анга талай тюрлениуле кийирликдиле, сора ол жууукъ заманда производствогъа берилликди. Биз а мындан арысында да бу проектни къураугъа болушуп турлукъбуз, - дегенди ол.
Экспедицияны башчысы Александр Зимин «Россейни хазнасы» жолоучулукъну къураргъа оюм 2018 жылда Москвадан жыйымдыкъ къауум Баш Кавказ сыртны Къабарты-Малкъарда кесеги бла баргъанда келгенин билдиргенди. Аны мураты – табийгъат ариулукълагъа къарагъандан сора да, къыралыбызны миллетлерини тарыхлары эм маданиятлары бла шагъырейлендириудю. Жолоучулукъла бизни республикабызны, Къарачай-Черкесни, Шимал Осетия-Аланияны, Ингушетияны, Дагъыстанны жерлери бла ётедиле, быйыл а алагъа Архыздан Сочиге дери жол да къошулгъанды. Алай бла проект Кавказны тенгизден тенгизге дери кёргюзтгенди, деп белгилегенди Зимин.
Экспедицияны Орус география обществону «Альтаир» жаш тёлю клубуну эм «Веломоторс» компанияны башламчылыкълары бла бардырылгъанды, аны ётдюрюуге себепликни республиканы Курортла эм туризм министерствосу этгенди.
