КъМР-ни Башчысы Казбек Коков РФ-де Следствие комитетни КъМР-де Следствие управлениясында болгъанды эмда ишчилени, аланы бетлеринде уа следствие органлада уруннганланы барын да, профессионал байрамлары бла алгъышлагъанды, тынгылы ишлери эмда энчи аскер операция бардырылгъан жерде борчларын толтургъан аскерчилерибизге себепликлери ючюн ыспас этгенди.
Тюбешиуге КъМР-ни Правительствосуну Председатели Мусукланы Алий, РФ-ни Президентини СКФО-да толу эркинликли келечисини аппаратыны тамата федерал инспектору Дмитрий Васильченко, право сакълаучу эм кюч структураланы оноучулары къатышхандыла.
«Следствие органланы хурметли ишчилери, следовательлени алгъыннгы тёлюлерича, сиз да бюгюнлюкде къыралны сейирлерин, инсанланы праволарын бла эркинликлерин сакълаугъа, аманлыкъчылыкъ бла кюрешге, законлукъну бла право низамны тутуугъа уллу юлюш къошасыз. Законну башчылыгъы праволу къыралны болумуну магъаналы жорукъларындан бириди. Сиз да ол жорукъну кесигизни къыйыныгъыз бла къаты сакълайсыз, хар ачыкъланнган аманлыкъ бла уа адамланы законну бла тюзлюкню хорлагъанларына ийнаныуларын кючлейсиз.
Следствияда ишлеу бийик профессионаллыкъдан сора да, бийик адеплиликни эмда жашаугъа тюз кёз къарамланы, борчха кертиликни излейди. Ол ышанла, профессионал эм энчиле да, сизде толусунлай бардыла. Ишигизге берилгенигиз, анга кертилигигиз ючюн ыразылыгъымы билдирирге излейме. Ийнанама, сиз, алгъын замандача, салыннган жууаплы борчланы жетишимли толтурлукъсуз. 
Бюгюнлюкде къыралыбызгъа къажаулукъгъа салыннган къужур чакъырыуланы кезиуюнде, шуёх болмагъан къыралланы спецслужбаларыны Россейге къажау бардыргъан тири ишлеринде борчларыгъыз уллуракъ, иги да къыйыныракъ болгъандыла. Борчугъузгъа тийишлиликде сиз террорист эмда экстремист халлы аманлыкъчылыкъла, къыралгъа бла жамауатха къажау башха ауур аманлыкъла бла кюрешде ал сатырда турасыз. Бизни барыбызны да борчубуз бирди – къыралыбыз Россей Федерацияны, ёз республикабызны да къоруулау, кючлеу эмда айнытыу. 
Следствие управленияны, республиканы прокуратурасыны, башха право сакълаучу органланы коллективлерине энчи аскер операция бардырылгъан тийреде борчларын толтургъан жерлешлерибизге билеклик этиу соруулагъа къайгъырып тургъанлары ючюн энчи ыспас этерге излейме. Аны ючюн да сау болугъуз!»- дегенди Казбек Коков кесини сёзюнде.
«Бизни заманыбызда следовательни усталыгъы бек къыйынладан бириди, ол энчи билимни, жууаплылыкъны, тюзлюкню эмда тынгылы эсни излейди. Битеу следствие управленияда ишлеген сотрудниклеге бет жарыкълы, кеси-кеслерин аямагъанлай уруннганлары, борчларына кертиликлери эмда хар бирини энчи къыйынлары ючюн ыразылыгъымы билдиреме», - дегенди Следствие управленияны таматасы, юстицияны генерал-майору Андрей Потапов.
Айырмалы ишчилеге къырал эм ведомстволу саугъала берилгендиле.