РФ-ни экономиканы айнытыу министрини орунбасары Сергей Назаров Шимал Кавказда республикалада «алчы» проектлени тамамлауну юсюнден видеоконференция халда кенгеш бардыргъанды. Къабарты-Малкъардан анга Правительствону Председателини биринчи орунбасары Сергей Говоров эм экономиканы айнытыу министр Рахайланы Борис къатышхандыла.

Министерстводан билдиргенлерича, бизни республикада аллай беш проект бардырылады. Ала бу бёлюмле бла байламлыдыла: къурулуш, эл мюлк, промышленность, туризм эм информациялы технологияла. Барын да тамамларгъа 2030 жылгъа дери 148 миллиард сом жиберилликди.

Кенгешде быйыл бу проектлени юсю бла не зат этилгенин сюзгендиле, ишни эсеплерин чыгъаргъандыла, 2024 жылны экинчи жарымында алагъа чурум салыргъа боллукъ къоркъууланы юсюнден да сёлешгендиле. Анга кёре уа проектлени паспортларын тюрлендириу низамны да белгилегендиле.

Сергей Назаров айтханнга кёре, быйыл биринчи июльгъа дери бу проектлеге 31,2 миллиард сом инвестицияла этилгендиле. Аны хайырындан 817 ишчи жер къуралгъанды, битеуда 6,3 миллиард сом багъасына продукция чыгъарылгъанды эмда жумушла  этилгендиле. Сёз ючюн, Чегем районда теплица комплексни биринчи кесеги (37,6 гектар) ишлеп башлагъанды; анда бир жылгъа 20 минг тонна бадыражан ёсдюрлюкдюле. Дагъыда хайырланыугъа 250,5 минг квадрат метр жашау журтла берилгендиле. Минги тауну этегинде уа Азау тала тап жарашдырылгъанды, ол тийреде курортда энтта бир канат жол ишлеп тебирегенди.

Айтылгъанны эсге алып, РФ-ни экономиканы айнытыу министрини орунбасары проектлени жашауда бардырыу жаны бла буйрукъла бергенди.

Улбашланы Мурат.