«Свой стиль» зэгухьэныгъэм хэтхэм я къыкIэлъыкIуэ гъэлъэгъуэ­ныгъэр Налшык къалэм и Хьэ­тIохъу­щокъуэм и жыг хадэм ит розэхэм я хьэсэхэм деж къыщызэ­Iуахащ. Ар къызэрагъэпэщащ су­рэттеххэм я махуэм ирихьэлIэу.

Гъэлъэгъуэныгъэм хагъэхьащ Шакманов Магомед, Бекоев Геннадий, Журт Хьэсэн, Лукьяненкэ Иван, Шипуновэ Иринэ, Пузенкэ Михаилрэ Дмитрийрэ, Байсиев Ахъмэт, Подвэ Александр, ди лэжьэгъу Къарей Элинэ сымэ я сурэтхэр. Лэжьыгъэхэр зытеухуа и лъэныкъуэкIэ куэду зэщхьэщыкIырт, натюрмотртхэр, цIыху сурэтхэр, щIыуэпсыр, къалэхэр, тхыдэри нобэри къызэщIаубыдэу. КъыжыIапхъэщ, мы сурэт щхъуэ­кIэплъыкIэхэм жыг хадэ зыгъэпсэ­хупIэм ущеплъыну нэхъри зэрыщIэ­щыгъуэр!
«Свой стиль» клубыр къызэIузыха икIи абы и унафэщI Лукьяненкэ Иван хьэщIэхэм защыхуигъазэм жиIащ 2004 гъэ лъандэрэ я IуэхущIапIэр зэрылажьэр, мы гъэм илъэс 20 зэрырикъур. 
Клубым хэтхэм я сурэтхэр кIуэ пэтми нэхъыфI, нэхъ щIэщыгъуэ зэрыхъур гъэщIэгъуэнщ. Арагъэнущ абы­хэм я лэжьыгъэхэм щIэупщIэм къащIыхэхъуэм и щхьэусыгъуэри. Гъэ­лъэ­гъуэныгъэм гъэ къэс къекIуа­лIэ цIыху нэфIэгуфIэхэм лэжьыгъэхэр ягу зэрыдыхьэм ахэр нэхъри трегъэгушхуэ.
Мыпхуэдэ гъэлъэгъуэныгъэхэм иджыри шыщхьэуIу, фокIадэ ма­зэхэм къыпащэну зэрамурадыр жиIа нэужь, я зэгухьэныгъэм хэтхэм сурэттеххэм я махуэмкIэ ехъуэхъуащ ­Лукьяненкэ, ахэр ехъулIэныгъэрэ ­гукъыдэжрэ щымыщIэну зэригуапэр къыхигъэщу. 
Мы Iуэху дахэм зрагъэхьэлIащ сурэттех гъуазджэм дихьэххэм, сурэттеххэм я благъэхэм, ныбжьэгъухэм. 

БжьыхьэлI  Розэ.
Сурэтхэр  Къарей  Элинэ  трихащ.