КъБР-м и Iэтащхьэ КIуэкIуэ Казбек лэжьыгъэ IуэхукIэ щыIащ Шэджэм рай­оным. 

Республикэм и Iэтащхьэм зригъэ­лъэгъуащ Щхьэлыкъуэ къуажэм щаухуэ, мы илъэсым и кIэм ирихьэлIэу хьэзыр ящIыну спорткомплексыр. А проектыр ягъэзащIэ къуажэхэм лъэныкъуэ куэдкIэ зегъэужьыным хуэунэтIа къэрал про­граммэмкIэ.
Унэм къызэщIиубыдэ щIыналъэр метр зэбгъузэнатIэу 1200-рэ мэхъу. Абы хэ­тынущ спортым хухэха пэш зэмылIэу­жьыгъуэхэр, медицинэм и лэжьакIуэм, гъэсакIуэхэм я пэшхэр, зытIэщIыпIэ-зы­хуэпэжыпIэхэр, зыгъэпскIыпIэхэр. Къуа­жэ щIалэгъуалэр дэзыхьэха икIи ехъу­лIэныгъэфIхэр щызыIэрагъэхьэ спорт бэнэкIэм, боксым зыхуэгъэсэнымкIэ зы­хуей псори къыщызэрагъэпэщынущ. Абы пэгъунэгъуу а къэрал программэмкIэ волейбол, баскетбол щыджэгун утыкухэр хэту губгъуэ IэрыщI зиIэ стадион щаухуэ. 
Шэджэм къалэм республикэм и Iэ­тащхьэм гулъытэ нэхъ хуищIу зыщыщигъэгъуэзащ тIысыпIэ 800 иIэу абы къы­щрагъэжьа курыт школым и ухуэныгъэр зэрекIуэкIым. Ар илъэсым и кIэм ирихьэлIэу хьэзыр ящIыну я мурадщ.
«Мыр мыхьэнэшхуэ зиIэ ухуэныгъэщ, - жиIащ КIуэкIуэ Казбек. – Урысейм и Президент Путин Владимир и Зэрызыхуи­гъазэми къызэрыхигъэщащи, сабийхэм унэтIыныгъэ куэдкIэ заужьын папщIэ зэманым декIу щытыкIэхэр къахузэгъэпэ­щыным, курыт школхэм щрагъэкIуэкI егъэ­джэныгъэр къэгъэщIэрэщIэжыным мыхьэнэшхуэ ирет. ШколыщIэр «Егъэ­джэныгъэм зегъэужьын» къэрал про­граммэм хэту доухуэ. Ар иджырей курыт школхэм я жыпхъэ нэхъ лъагэ дыдэхэм хуэкIуэу щытынущ».
Ухуэныгъэр корпус зыбжанэу зэхэтынущ. Абы иIэнущ Iуэхугъуэ хэхахэм щыхурагъаджэ класс щхьэхуэхэр, зэхыхьэхэр щрагъэкIуэкI пэшышхуэ, ­шхапIэ, пщэфIапIэ, спорт пэшу тIу, футбол губгъуэ, волейбол, баскетбол щы­джэгу утыкухэр, къэжыхьыным хуэщIа шынагъуэншэ ­гъуэгухэр, зыгъэпсэхупIэ щIыпIэхэр.
Апхуэдэу районым ит курыт школхэр сыт и лъэныкъуэкIи зыхуей хуэзэу зэ­рагъэпэщыж. Къапщтэмэ, Лашынкъей дэт курыт школыр 1959 гъэм яухуауэ ­щытащ, ар зэгъэпэщыжыныгъэшхуэ хуэ­ныкъуэт. А лэжьыгъэр ирагъэкIуэкIащ «Егъэджэныгъэм и школ IэнатIэр къэгъэщIэрэщIэжын» щIыналъэ программэм ипкъ иткIэ.
КъищынэмыщIауэ, районым и курыт школиплIым «Зыужьыныгъэм и къежьапIэ» егъэджэныгъэ центрхэр щолажьэ.
Жылагъуэ щIыпIэхэр зэIузэпэщ щIы­ным хуэунэтIа етIуанэ проектыр щагъэзащIэ Шэджэм. Япэр, «Чегем-парк» фIэ­щыгъэр зиIэр, 2021 гъэм зэфIагъэкIауэ щытащ. Иджыпсту йолэжь «Чегем.Движение вперед!» проектым.
«IуэхугъуитIри муниципалитетхэр дэ­Iыгъыным хуэунэтIауэ ди Президент Путин Владимир и пщэрылъкIэ зрагъэуб­гъуауэ щыта «Тхыдэ мыхьэнэ зиIэ жы­лэхэмрэ къалэ цIыкIухэмрэ зегъэужьын» урысейпсо зэпеуэм нэхъыфIу къыщалъытащ. ЗэIузэпэщ лэжьыгъэхэр ирагъэ­кIуэкI «Къалэхэр ущыпсэуну тынш щIын» къэрал проектымрэ «ПсэупIэмрэ къалэ кIуэцIымрэ» лъэпкъ проектымрэ я грант мылъкумкIэ. Iуэхум текIуэдэнущ сом ­мелуани 100-м щIигъу», - жиIащ КIуэкIуэ Казбек.
ЗэIузэпэщ ящIыну щIыпIэхэр Шэджэм щыпсэухэм къыхахащ. Лэжьыгъэхэр ще­кIуэкIынущ КIарэм и цIэр зезыхьэ, Надречнэ уэрамхэм я ипщэ Iыхьэм, ­район сымаджэщым и щIыналъэм, Шэ­джэм псым и Iуфэм. Мыбдеж щащIыну гъуэгухэр шынагъуэншагъэм и хабзэхэм тету щытынущ, жылагъуэ зэхуэсыпIэхэм деж къыщызэрагъэпэщынущ скейт-парк, спорт джэгупIэ, воркаут утыкухэр, къыщакIухьын щIыпIэхэр.
Псори зэхэту районым къэрал про­граммэмкIэ къыщызэрагъэпэщащ жы­лагъуэ щIыпIэу 5, пщIантIэхэм епха щIыналъэу 8 зэIузэпэщ ящIащ.
Шэджэм районым КIуэкIуэ Казбек щыгъуазэ зыщищIащ иджыпсту зэрагъэ­пэщыж Шэджэм ЕIуанэ - Булунгу гъуэгу Iыхьэм щекIуэкI лэжьыгъэхэми. Бгылъэм зэрыхуэзэм къыхэкIыу, ар къару нэхъыбэ зытекIуадэхэм язщ. 
2022 гъэм щIадзауэ щытащ а гъуэгум елэжьыну, а зэман дыдэм Шэджэм Ищхъэрэ - Хъущтэ-Cырт Iыхьэмрэ къуажэ щIыбхэм блэкI гъуэгухэмрэ зэрагъэпэ­щыжауэ щытащ. Псори зэхэту зэIузэпэщ ящIыжа гъуэгухэр километр 12,5-рэ мэхъу, абыхэм лъэмыжи 5-рэ гъуэгуб­гъум Iут уэздыгъэхэмрэ яхэтщ. 
Мы гъэм зэфIагъэкIащ Хъущтэ-Cыртрэ Шэджэм псыкъелъэхэмрэ зэпызыщIэ  гъуэгу дэгъэзеигъуэм елэжьын Iуэхури. Ар нэхъ шынагъуэншэ хъуащ, лъэс лъагъуэхэр пхашащ, машинэ гъэувыпIэхэр хахащ, уэздыгъэхэр трагъэуващ. 
Ухуэныгъэ лэжьыгъэхэр щокIуэкI Шэ­джэм псыкъелъэхэмрэ Булунгурэ я зэ­хуакум дэт километр 25-ми. Ар яухыну я мурадщ 2026 гъэм и щэкIуэгъуэм. Гъуэгу щIыIури пкъохэри яхъуэж, лъэмыж ухуэныгъэу 10-м нэс зэрагъэпэщыж. 
Шэджэм псыкъелъэхэм деж КIуэкIуэ Казбек щаIущIащ районым и щIыпIэ администрацэхэм я унафэщIхэм икIи зэ­лэжьыпхъэхэр яубзыхуащ. Республикэм и Iэтащхьэм ухуакIуэхэм фIыщIэ яхуи­щIащ, дунейм и сыт хуэдэ щытыкIэми цIыхухэр ягъэтыншын, гъуэгухэр зекIуэгъуафIэ ящIын папщIэ, я къалэнхэр зэрагъэзащIэм щхьэкIэ.