Адамны кесине неда аны сабийине прививка этерге кереклисини юсюнден даулашла бюгюнлюкде да тохтамайдыла. Алай кёпжыллыкъ сынаула бла статистика шартла профилактика халда дарман салыргъа кереклисин шарт белгилейдиле. Бу амал адамгъа не береди, аны къаллай къоркъууладан сакълайды - аланы юсюнден Роспотребнадзорда айтхандыла.

Коклюш, дифтерия, кёме аурууладан къыйналгъан неда полиомиелитни хатасындан сакъат болуп къалгъан сабийни кеси кёзю бла кёрген ата-анала бу амалны (вакцинация) хайырлыгъына бир да ишекли болмаз эдиле. Бюгюнлюкде кёп ауруулагъа къажау вакцинала бардыла. Алай, жарсыугъа, прививкала этерге сюймегенлеге тюберге да боллукъду. Быллай терс акъыллылыкъ жукъгъан аурууланы жайылыууна осал жаны бла себеплик этеди.

Иммунизация (вакцинаны прививкасы) жаланда ол къоркъуулу аурууланы болдурмаз умут бла этилгенин ангыларгъа керекди. Ала шёндю толусунлай къурутулгъандыла деп айтырча тюйюлдю. Алай бир-бирлерин а, сёз ючюн, чечекни, жаланда дарман салыу бла къурутургъа онг табылгъанды.

Быллай прививкалары болмагъанлагъа стационарлада плановый операцияланы этерге жарамайды. Аллай сабийлени солуу учреждениялагъа да алмайдыла. Вакцинациягъа угъай дерни аллында, аны хатасындан сабийде къайсы ауруугъа иммунитети болмазлыгъыны юсюнден сагъыш этерге тийишлиди. Сабийни, аны тёгерегиндегилени саулукъларына, жашауларына къоркъуу тюшгенин да билирге керекдиле ата-анала. Халкъны эм азы бла 95 проценти ётсе вакцинацияны, эпидемиология жаны бла болум ол заманда саналады игиге.

Россейни Саулукъ сакълау министерствосу иммуно-профилактика мадарланы тизмесине пневмококк инфекциягъа къажау прививкаланы да къошханды. Бу аурууну хатасындан жыл сайын жер башында миллиондан артыкъ адам ёледи. Жарсыугъа, аланы экиден бири беш жыллары окъуна толмагъан сабийледиле. Бегирекда къоркъуулугъа уа пневмококк менингит (адамны мыйысы ауруйду) саналады. Инфекцияла къозгъагъан къулакъ аурууланы ючден бирини сылтауу да ол бактерияды.

Бир-бир ата-анала бизни сабийибиз шёндю ансыз да ауруулуду, не прививка этерге кереклиси барды анга энтта да дерге ёчдюле. Алай баланы иммунитети артыкъ кючлю тюйюл эсе, ауруу бютюнда осалгъа кетерикди. Алагъа вакцинацияны этмей жарамайды.

Саусузгъа бакъгъандан эсе, аны аурутмазгъа тынч болгъаны эрттеден да белгилиди. Прививканы этдирмей болмайсыз деп, сизни къысаргъа бир адамны да эркинлиги жокъду. Кесигизге, сабийлеригизге да игини бла аманны сиз айырасыз. Алай вакцинацияны этиуге къажау тургъанланы айтханларын тюзге санап, прививкала этдирмегенле саулукъларына къоркъуу саладыла.

Улбашланы Мурат хазырлагъанды.