Къэбэрдей-Балъкъэрым мы махуэхэм щекIуэкIащ квадроциклхэм тесхэм я зекIуэ. «Iуащхьэмахуэ и хъуреягъкIэ» зыфIаща а Iуэхур Шэрэдж, Шэджэм, Iуащхьэмахуэ районхэм къыщызэ­рагъэпэщащ.

Ар йокIуэкI «Урысейм и щIэинхэр» лъахэхутэ Iуэхум хыхьэу. Абы хэтхэр Налшык къалэм щежьащ, Хумалан уэхым блэкIри, Хуламо-­Безенги аузым екIуэлIащ. Абдеж зыплъыхьакIуэхэр лъэсу Уллу-Чиран мылылъэм дэ­кIуеящ, щIыпIэ хъугъуэфIы­гъуэхэм зыщагъэгъуэзащ. Адэ­кIэ я гъуэгур Шэджэм аузым кIуэрт. Абы щхьэкIэ Думала щхьэдэхы­пIэм дэкIын хуейуэ къапэщылъти, абдеж экспедицэм хэтхэр гъэу­нэхуныгъэ хэхуащ - уэшхым илъэса гъуэгур ерагъыу къызэранэкIыфауэ аращ. Ап­хуэдэу ахэр щыхьэщIащ Шэджэм аузым, дэкIащ Шаурту мылылъэмрэ псынэпс къыщыщIэж щIы­пIэхэмрэ. АдэкIэ Актопрак щхьэдэхы­пIэр къагъэIуры­щIэри, Iуа­щхьэмахуэ лъапэ­кIэ ягъэзащ. 
Мы Iуэхум фIагъыу хэлъращи, щIыпIэхэм зыщаплъыхь къудей мыхъуу, цIыхухэм зрагъэцIыху Къэбэрдей-Балъкъэрым ис лъэпкъхэм я хабзэхэри шхыныгъуэхэри. 
Экспедицэр зэрыкIуэну ­лъагъуэр зэхэзыгъэувар лъахэхутэ, Урыс географие зэгухьэныгъэм хэт Мокаев Тенгизщ. Iуэхур къызэзыгъэпэщар гъуэгуншэ щIыпIэхэм щызекIуэну зыфIэфIхэм я «Квадроостров» москва клу­бымрэ «Альтаир» щIалэгъуа­лэ клубымрэщ. Абыхэм я дэIэпыкъуэгъущ КъБР-м ЗыгъэпсэхупIэхэмрэ туризмэмкIэ и министерствэмрэ «Вело-Моторс» зэгухьэныгъэмрэ.  
Экспедицэм хэтахэр зыщы­щыр Москварэ Москва областымрэщ, гъуэгуншэ щIы­пIэхэм папщIэ техникэ къы­дэзыгъэкI IэнатIэхэм я уна­фэщIхэмрэ лэжьакIуэ­хэмрэ яхэту.
Гупым и унафэщI Зимин Александр зэрыжиIэмкIэ, «Урысейм и щIэинхэр» Iуэхур 2018 гъэм къыхалъхьауэ щытащ, Москва щыщу зэщIагъэуIуа гупыр япэу кавказ ­къурш тхыцIэ нэхъыщхьэм щекIуэкIам щыгъуэ (Къэбэрдей-Балъкъэрым хуэзэу).
Мы Iуэхум и пэ къихуэу, Архъыз къыщыщIэдзауэ Сочэ нэсу апхуэдэ гъуэгуанэ зэпачащ. 2024 гъэм иджыри экспедицэу 6 къыщызэрагъэ­пэщынущ Къэбэрдей-Балъкъэрым, Къэрэшей-Шэрджэ­сым, Осетие Ищхъэ­рэ -­ Аланием, Ингушым, Дагъыс­тэ­ным.

БАГЪЭТЫР  Луизэ.