Сабийм и хуитыныгъэхэмкIэ уполномоченнэу КъБР-м щыIэ Лъынэ Светланэ къип­щытащ Урысей ФСИН-м и управленэу ­КъБР-м щыIэм и СИЗО №I-м балигъ мы­хъуахэу шэч зыхуащIхэр, ягъэкъуаншэхэр, суд зытращIыхьахэр зэрыщаIыгъ щIыкIэр.

IуэхущIапIэм и унафэщIым и къалэнхэр пIалъэкIэ зыгъэзащIэ ЩоджэнцIыкIу Таймуразрэ УФСИН-м цIыхум и хуитыныгъэхэр щагъэзэщIэнымкIэ и управленэм и унафэщIым и дэIэпыкъуэгъу Текаевэ Ритэрэ ящIыгъуу сабий омбудсменым къызэхиплъыхьащ пэш­хэр, щыгъуазэ зищIащ къилъхуагъащIэ цIы­кIур зыщIыгъу цIыхубзыр камерэм зэрыща­Iыгъ щытыкIэм. 
Сабийм и хуитыныгъэхэмкIэ уполномоченнэр епсэлъащ ягъэкъуаншэхэм. Абы къип­щытащ ахэр медицинэ и лъэныкъуэкIэ къызэрызэгъэпэщар, къалъхуагъащIэ сабийм кIэлъыплъынымкIэ хабзэм къигъэув­хэр зэрагъэзащIэр, зыхуэза балигъ мыхъуа­хэм гъэсэныгъэ, егъэджэныгъэ я лъэныкъуэ­кIэ зэрадэлажьэр. Омбудсменым гулъытэ хэ­ха хуищIащ шэч зыхуащIхэм, ягъэкъуан­шэ­хэмрэ ягъэтIысахэмрэ я Iыхьлыхэмрэ балигъ мыхъуа я сабийхэмрэ социальнэ зэпыщIэныгъэхэр хуаIэным. 
КъинэмыщIауэ, Лъынэ Светланэ яIущIащ я щхьэ IуэхукIэ лъэIу тхылъ ятхыу зыкъыхуэзыгъэзахэм, апхуэдэуи бын куэд зиIэ анэр хабзэм теухуауэ зыщIэупщIахэр гуригъэIуащ. 
Урысей ФСИН-м и управленэу КъБР-м щы­Iэм и следственнэ изолятор №I-м зыщип­лъыхьа нэужь, Лъынэм балигъ мыхъуахэмрэ сабий цIыкIухэр зыщIыгъу цIыхубзхэмрэ IуэхущIапIэм зыхуей хуэзэу, тэмэму щаIыгъыу къилъытащ. 

УЭРДОКЪУЭ Женя.