Бусагъатда Грозныйде «Уллу Кавказ – тенгизден тенгизге дери» деген инвестиция форум бардырылады. Ол Россейни Президентини буйругъун толтурууну чегинде СКФО-ну  социал-экономика жаны бла айнытыугъа себеплик этер муратда къуралгъанды.

Форумну ишчи программасына инфраструктура, ЖКХ эм энергетика, агропромышленный комплекс, спорт, туризм  эм улоула, предпринимательствогъа болушлукъ этиу, умутландыргъан проектлени тамамлау, ол санда къырал-энчи иели партнёрство жаны бла, жаш тёлю политика эм кёп башха сферала киредиле.

Анда республиканы спорт министри Хасанланы Ислам да болгъанды, ол Россейни спорт министри Михаил Дегтярев ётдюрген «Спорт Кавказ» сессиягъа къатышханды. Сессияны кезиуюнде Къабарты-Малкъарны Спорт министерствосу бла келишимле тауусулгъандыла – ата журтлу фитнес индустрияны айнытырча миллет фитнес биригиу бла, сора республиканы «Къабарты-Малкъарда физкультураны бла спортну айнытыу» къырал программаны толтурууну юсюнден. Дагъыда Санкт-Петербургну Физкультураны, спортну эм саулукъну П.Ф. Лесгафтны атын жюрютген миллет къырал университети бла бирге ишлерге да келишимге къол салыннганды. 

Кульчаланы Зульфия.