Шёндюгю жашауда билим алмай амал жокъду. Жаш адам университетде хакъсыз жерге орналса игиди, алай болалмаса уа, тёлеп окъургъа боллукъду. Анга уа тийишли кредит алыргъа амал барды. Аны юсюнден толу информацияны Объясняем.рф порталда басмалагъандыла.

Окъуугъа кредит берген банкланы тизмеси РФ-ни Билим бериу министерствосуну сайтында барды. Ала ахчаны учуз ставкасы (3%) бла бередиле. Окъугъан кезиуде жаланда процентлерин тёлерге керекди. Кредитни кесин жабаргъа уа дипломну алгъандан сора 15 жыл бериледи.

Бу кредитни къайсы курсда окъуй турса да алыргъа боллукъду, сюйсегиз, ахыр курсда окъуна. Билим бериу учреждениягъа ахчаны банк кезиу-кезиу кёчюреди: хар семестр неда жыл сайын. Кредитни мардасын (ёлчемин) да банк кеси тохташдырады.

Къаллай окъуугъа бериледи ол?

Кредит жаланда билим бериу лицензиясы болгъан колледжде неда вуза окъургъа бериледи. Аны тюзлюгюн а Рособрнадзорну сайтында билирге боллукъду.

Студент къалай сюйсе да окъургъа эркинди: очный, заочный неда къатыш халда. Кеси да бакалавриат, магистратура, специалитет, аспирантура, ординатура болсун – башха тюйюлдю. Экинчи, ючюнчю усталыкъ алама дегенлеге да чырмау жокъду.

Ким алаллыкъды аны?

РФ-ни инсанлары, кеслери да Россейде дайым халда эсепде тургъанла.

Заявканы 14 жылдан сора берирге жарайды, алай ата-анадан эркинлик алыргъа керекди.

Къаллай документле изленирикдиле?

- Паспорт;

- Билим бериу учреждение бла келишим;

- Биринчи тёлеу этилгенине счёт;

18 жыллары толмагъан студентле дагъыда бу къагъытланы кёргюзтюрге керекдиле:

- туугъанына шагъат этген свидетельство;

- ата-анасыны неда анга къарагъан адамны паспорту;

- ата-анасындан неда анга къарагъан адамдан эркинлик (кредит алыргъа).

Не ючюн угъай дерге боллукъдула?

- документлени къайсысы эсе да жетмейди;

- инсанны кредит тарыхы тапсызды, борчлары да бардыла;

- ахчаны толусунлай къайтарыр кезиуде инсаннга 70-75 жыл боллукъду.

Окъугъан кезиуде къалай тёленеди?

Студентге банк энчи кредит счёт ачарыкъды. Анга уа ол хар ай сайын тёлеуюн кёчюрюп турургъа керекди. График кредит келишимде белгиленеди.

Окъугъан кезиуде, сора аны тауусуп, тогъуз ай озгъунчу дери льгота барды – жаланда процентлени тёлерге керекди. Кредитни болжалындан алгъа жабаргъа жарайды, аны ючюн банк тазир салмайды.  

Студент академический отпуск алса, аны юсюнден банкга билдирирге керекди. Жаш адам окъуудан къысталса неда ол андан кеси кетсе, анга льготала боллукъ тюйюлдюле: банк кредитни процентлерин тёрели кредитледеча алай этерикди (аны ёлчеми келишимде жазылып болуучуду). Ахчаны къайтарыр кезиую тюрленирик тюйюлдю (15 жыллай къаллыкъды), алай айлыкъ тёлеуле уа иги да ёсерикдиле.

Улбашланы Мурат хазырлагъанды.