Кёп болмай Нальчикде «Иш кёллю Россей» жамауат организацияны мурдорунда «Франчайзинг - предпринимательликни амалларындан бири» деген аты бла «тёгерек стол» ётгенди. Анда модераторну орунунда Шимал-Кавказ федерал округну ашханаларыны, къонакъ юйлерини бла къонакъбайлыкъны къурау жаны бла ассоциациясыны таматасы Гузеланы Индира болгъанды. Тюбешиуге КъМР-ни Сатыу-алыу-промышленность палатасыны, Прохладна бла Май районланы администрацияларыны, бизнес-инкубаторланы келечилери эм предпринимательле да къатышхандыла.

  Россейде франчайзингден ассоциацияны (РАФ) таматасы Юрий Михайличенко   франшиза амал не бла хайырлы болгъаныны юсюнден хапарлагъанды. Ол санда тасхалары бла шагъырейлендиргенди. Сёз ючюн, ол коллегаларына эм биринчи аны файдалыгъына эм бизнес проектде къаллай амалла кёргюзтюлгенлерине эс бурургъа чакъыргъанды.

«Мени бизнесим» араны таматасыны орунбасары Османланы Залина да МСП.РФ деген онлайн-сервисни презентациясын бардыргъанды.  Аны кезиуюнде РАФ-ны базасында болгъан ышаннгылы франшизала бла шагъырей этгенди. Ол санда ара франчайзинг бла кюрешген предпринимательлеге болушлукъ тапдырыргъа хазырлыгъын да белгилегенди. Андан сора да, продукцияны тышына чыгъарып сатар ючюн этерге тюшген къоранчланы бир кесегин жабаргъа болушханларын да эсге салгъанды.

 Гузеланы Индира да франчайзинги айнытырча UDS программаны ишин ачыкълагъанды. Бюгюнлюкде аны 65 къыралда 6 мингден аслам предприниматель эм 27 миллион чакълы алыучу хайырланады.  

UDS франшизаны энчилиги - багъалы инфраструктурасыз бизнесни кенгертирге, хазыр продукцияны сатаргъа онг тапдыргъаны эм алыучуланы санын да кёбейтирге болушханыды. 

Бизнес файдалы болурча 

Бу кюнледе «Иш кёллю Россей» жамауат организацияны бизнесни айнытыу жаны бла эксперти, маркетолог Гузеланы Индира къурап «Берег» кафеде тиширыу предпринимательле бла тёрели тюбешиу ётгенди. Анда автоматизацияны хайыры бла гитче бизнес файдалы болурча онгла сюзюлгендиле.   

Тюбешиуге сынамлы предпринимательле эм ишлерин энди башлай тебирегенле, маркетологла эм digital-экспертле да къатышхандыла. 

Спикерни орунунда, маркетолог, PR эксперт жыйырма жылгъа (1400 кейсни автору), Гузейланы Индира бла бизнесде коммерция бла автоматизациядан эксперт Изабелла Хамбазарова болгъандыла.

Тюбешиуде Гузеланы Индира къысха заманда файда тюшюрюрча автоматизация бла систематизацияны къыйматлыгъы юсюнден айтханды. Ол санда танг кесек юлгюде да келтиргенди, жетишимли проектлени эм терк-терк тюбей тургъан проблемаланы юсюнден да билдиргенди.

Спикерле хар предпрнимательни энчилигин эсге алып эсгериуле бергендиле. Ол санда маркетингден, сатыу-алыудан, продукцияны хазырлаудан, административ жаны бла оноу этиуден, клиентлеге къошулурча эм башха шартла сюзгендиле. Алай бла тюбешиуню кезиуюнде хар адамны ишине кёре бизнес-планны игилендирирча модель къураргъа болушхандыла, къысха заманда иги файда тюшюрюп башларча къаллай онгла хайырланса иги боллугъу бла байламлы «жол карта» да хазыр этилгенди.