«Спартак-Налшыкыр» щыджэгу Урысей Федерацэм футболымкIэ и етIуанэ лигэм и «Б» дивизионым и Япэ гупым бадзэуэгъуэм и 6-м щызэхэта епщыкIубланэ джэгугъуэм иужькIэ зэхьэзэхуэр тхьэмахуищкIэ щызэпагъэуащ. Командэхэм Iэмал ягъуэтащ мащIэу загъэпсэхуу, адэкIэ зэпеуэм зыхуэгъэхьэзырын щIадзэну. Ар къэзэрагъэсэбэпынум теухуащ тренер нэхъыщхьэ Битокъу Тимур и нобэрей псалъэмакъыр.

- Дызыхэт зэхьэзэхуэм и турнир таблицэм иджыпсту щытIыгъ увыпIэм зыдгъэпсэхуну зы Iэмали къыдитыркъым. Пэжщ, махуэм зыщыплIкIэ дутIыпщри, къызэхуэсыжауэ загъасэ, махуэ тIэу тренировкэ ирагъэкIуэкIыу. КъыдэхъулIахэмрэ дызыхунэмысахэмрэ къритпщытэжыну Нэзран и «Ангушт»-м зэныбжьэгъугъэ зэIущIэ мыгувэу дедгъэкIуэ­кIынущ. Нэхъыбэ щыIэну къыщIэкIынкъым, зэрызыдгъэхьэзырыну зэманыр къызэрыдэмэщIэкIым къыхэкIыу. 
- ЗэхъуэкIыныгъэ гуэрхэр гупым къыщыхъуну?
- ЩIалэщIэхэм дакIэлъоплъ икIи дигу ирихь къахэкIмэ, зыхэдгъэхьэнущ. Нэхъыбэу тегъэщIапIэ тщIынур ди щIыпIэм къыщалъхуа, топ джэгуным зыщезыгъэсахэращ. Дахуейщ гъуащхьэхъумэхэми гъуащхьауэхэми. НэгъуэщI щIыпIэ къитшIами, ахэр дыдейхэм нэхърэ куэдкIэ нэхъ Iэзэу щытыпхъэщ. АрщхьэкIэ апхуэдэхэр къепшэлIэну гугъущ ахъшэр ущимащIэм и деж. 
Гупым хэкIыжахэщ Котовымрэ Дмитриенкэрэ. Абы щы­гъуэми ди пашэхэр къызэрыдгъэнэнум дыхущIокъу икIи абыхэм депсэлъащ. Ауэ, дауэ футболистыр зэрыпIыгъынур, зэран ущIыхуэхъун хуейри сыт, дэ нэхърэ зыкъомкIэ нэхъыбэ къыщилэжьыфыну щIыпIэ къыхуагъэлъагъуэмэ? Абыхэми унагъуэ яIэщ, сабий япI.
- АдэкIэ сытхэр фи мурад?
- ДыхущIэкъунущ нобэкIэ дызэрыхуа щытыкIэ гугъум дыкъикIыну, блэкIа зэIущIэхэм дерс къыхэтхыу ипэкIэ дыкIуэтэну. Абы папщIэ ерыщу зыгъэхьэзырын, джэгун хуейщ. 

Зыгъэхьэзырар  Мэзкуу  Къанщ.