Бу кюнледе Къабарты-Малкъар къырал университетни бошагъан бир къауум жаш бла къыз кеслерини дипломларын алгъандыла. Аны бла байламлы къууанчлы жыйылыула да озгъандыла.

Сёз ючюн, быйыл КъМКъУ-ну  химия эмда биология институтун 124 адам бошагъанды. Аладан  отузусу уа  къызыл дипломлагъа тийишли  болгъандыла.

Байрамны РФ-ни Президентинде халкъла аралы байламлыкъла жаны бла советни эмда университетни осуйлукъ этген советини келечиси Хаути Сохроков ачханды эмда жаш тёлюге алгъыш этгенди. Алагъа хар заманда да тюз оноу чыгъара билирге, ахшыны амандан айырыргъа тежегенди. Аны ючюн а тамата тёлюню ахшы сынамына таяныргъа тийишлисин да чертгенди.

«Химия» эмда «биология» ызлада окъугъанланы, андан сора да, КъМР-ни Парламентини депутаты Сафарби Шхагапсоев, органикалы химияны эмда бийик молекулаланы къошулууланы кафедрасыны башчысы Малкъондуланы Юсуф, башхала да, алгъышлап, жетишимли болурларын тилегендиле.

Студентлени атларындан а кеслерини устазларына ыразылыкъларын Милена Шалова бла Алихан Кайсинов билдиргендиле. Не тюрлю жарсыулары бла да преподавательлерине келселе, аладан болушлукъ тапмагъанлай, сорууларына тийишли жууапла алмагъанлай къалмагъанларын айтып, ыспас этгендиле.

Быйыл университетни бошагъан жаш адамланы арасында эм ахырында дипломла бла аны жалгъан интеллект эмда тарихли технологияла институтунда окъугъанла саугъаланнгандыла. Аны бу жол 135 адам тауусханды. Къызыл дипломла уа 38 жашха бла къызгъа берилгендиле.

Бу бёлюмню бошагъанланы байрамында уа эм алгъа жаш адамланы институтну таматасы Замир Шомахов алгъышлап, ала уллу жашауда сайлагъан жолларына сокъуранмай, усталыкъларында жетишимли болурларын сюйгенин билдиргенди. Ызы бла алгъыш сёзлеге КъМКъУ-ну биринчи проректору Мурат Гукепшоков, Сбербанк ПАО-ну Къабарты-Малкъарда бёлюмюню башчысы Камбулат Керефов, бирсиле да къошулгъандыла.

Байрам ингирлени кезиуюнде окъуу юйню чыгъармачылыкъ къауумлары да кеслерини хунерлерин жыйылгъанлагъа саугъалагъандыла. Ахырында уа жашла бла къызла КъМКъУ-ну гимнин жырлагъандыла.

Трамланы Зухура.