Жай кезиуде суулада, кёлледе ачыгъанланы саны ёсгенин МЧС дайым билдиргенлей турады.

Ведомствону регионда Баш управлениясындан эсгертгенлерича, сууда асыры базыныулу, уллу кёллю болургъа жарамайды. Марданы билирге, жорукъланы унутмазгъа керекди. Бек биринчи уа, жангызда эркин этилген жерледе жууунургъа тийишлиди - алада къутхарыучула ишлейдиле, ачыгъаннга терк жеталлыкъдыла. Жюзгенде, бурууладан ары бармагъыз, сууда болгъаныгъызда бир бирни сермеп ойнамагъыз. Танымагъан жерлеригизде суугъа бийикден секирмегиз, кеф болуп тургъанлай, суугъа ахырысы бла да кирмегиз. Узакъгъа жюзюу, сууда кёп туруу санланы къурушдурургъа боллукъду, асыры бек арысагъыз, артха жеталмазыгъызгъа къоркъуу да чыгъады, бютюнда уа сууукъ сууда. Солургъа сабийле бла баргъан эсегиз, ала туурадан кетмесинле. Бу жорукъланы толтуруу палахдан сакъларыкъды, хар инсанны къоркъуусузлугъу, эм алгъа, аны кесини къолундады.

Кульчаланы Зульфия.