Быйыл ал беш айны ичинде Къабарты-Малкъарда налогла бла 11,5 миллиард сом жыйылгъанды. Бу кезиуге белгиленнген борч 114 процентге толтурулгъанды, былтырны ол кезиую бла тенглешдиргенде уа, ёсюм 124,7 процент болгъанды, деп билдиргендиле Федерал налог службаны бизни республикада управлениясындан (УФНС).

Сагъынылгъан ахчадан 2,7 миллиард сому къыралны бюджетине жиберилгенди. Ол былтыр ал беш айны кёрюмдюсю бла тенглешдиргенде, 1,1 миллиард сомгъа асламды. Республиканы битеулю бюджетине уа 8,8 миллиард сом (1,2 миллиардха кёп) тюшгенди. Бу кезиуге план 115 процентге толтурулгъанды. Ол 8,8 миллиард сомдан 6,8 миллиарды республиканы бохчасына, къалгъаны уа жер-жерли бюджетге баргъанды. Аланы барында да иги ёсюм эсленеди.

Бюджетледен тышында фондлагъа социал тёлеуле бла 5,7 миллиард сомдан аз аслам жыйылгъанды. Ол санда 4,6 миллиард Россей Федерацияны Пенсия фондуна аналыкъ бла байламлы эмда болжаллы халда ишсиз тургъанлагъа деп социал страхованиягъа бёлюннгенди. Ишлеген инсанланы борчлу халда медицина страхование этиуге уа (тийишли фондха) 1,1 миллиард сом жиберилгенди.

Улбашланы Мурат хазырлагъанды.