Мектепледе окъугъан жашларыбыз бла къызларыбыз башха-башха дерс олимпиадалада, эришиуледе кеслерини билимлерин, хунерлерин ачыкълай, болдургъан жетишимлери бла бизни да кёллендиргенлей келедиле. Жыл сайын аланы танг кесеги школчуланы къырал даражада бардырылгъан предмет олимпиадаларына да къатышадыла. Белгилегенибизча, энди былтырдан бери ол сынауланы регион неда къырал урумунда хорлагъанла, аланы хазырлагъан устазла да КъМР-ни Башчысыны премиясы бла да саугъаланадыла. Ол тизмеге ана тилледен бла адабиятладан окъутханла эмда ала юйретгенле да киредиле.

Айхай да, бюгюнлюкде ёз тилибизни болуму алай махтанырча да болмагъан заманда сабийлерибизни бу жаны бла не аз да жетишимлери уа кёлюбюзню кётюргенлерине сёз да жокъду. Аладан бириди бабугентчи къызчыкъ Джекеланы Самира да. Ол бу кюнледе Казбек Коков саугъалагъан окъуучуланы тизмесиндеди.

Бюгюнлюкде ол Къашхатауну битеулю билим берген мектебин биринчи даражалы алтын майдал бла бошагъанды. Ана тилибизге сюймеклиги бла ол бу дерсден бардырылгъан олимпиадалагъа дайым да къатыша, жетишимли болгъанлай тургъанды. Сёз ючюн, тогъузунчу-онунчу класслада болгъанында, сынауланы районда озгъан кезиулеринде биринчи жерни алгъанды. Озгъан окъуу жылда да аллай даражагъа районда, регионда да тийишли болгъаны ючюн а энди огъарыда айтылгъан саугъаны да алгъанды. Аны тилибизни жашырынлыкъларына тюшюндюрген а хунерлиги бла республикабызда белгили устазларыбыздан бири Чеченланы Ариужан Мухаевнады.

Андан сора да, Самираны озгъан жылда малкъар тилде «Гитче Ата журтум – Къабарты-Малкъарым» деген темагъа жазгъан кёлден жазмасы регионда ючюнчю жерге чыкъгъанды. Бу иши ючюн а ол КъМР-ни Жарыкъландырыу эмда илму министерствосуну даражалы диплому бла белгиленнгенди.

- Элде аппам Лабадин бла ыннам Аминатны къатларында ёсгенме да, ана тилибизге сюймеклигими ала къозгъагъандыла эмда кючлендиргендиле. Жомакъланы, тарыхыбызны юслеринден хапарланы, бешик жырланы юйде эшитгенлей тургъанма. Атам-анам, сабийле, тёртюбюз да жаланда тауча сёлешебиз. Адам ёз тилинде сёлешсе, аны жюреги бютюнда халал эмда огъурлу болгъан сунама, - дегенди кеси уа.

Ол, андан сора да, бирси дерследен олимпиадалада айырмалы болгъанлай  тургъанды. Озгъан окъуу жылда биологиядан районда биринчи жерни алгъанды, регионда урумуна да къатышып, айырмалы болгъанды. Быйыл да бу дерсден призёрду. Андан а аны устаз Холамханланы Жаннета окъутханды.

Бир къырал экзаменлеге да тири хазырланып, репетиторлагъа да жюрюгенди. Дерс олимпиадалагъа къатышханлай тургъаны уа кесини себеплигин да бергенди. Самира орус тилден – 81, химиядан – 90 баллагъа тийишли болгъанды.

Ол ана тилибизде басмаланнган чыгъармаланы сюйюп окъуйду. Сёз ючюн, Толгъурланы Зейтунну «Къызгъыл кырдыкла» деген романында автор Ата журтну, анга сюймекликни эмда кертичиликни къалай суратлагъаны анга сейирди.

Къайсы жаш адамча, асламысында акъ сёзню жаратады. Анга Къулийланы Къайсынны, Зумакъулланы Танзиляны лирика тизгинлери бютюн сейирдиле. Мечиланы Кязимни «Жаралы жугъутуру» уа эркинликни темасы бла жууукъду. Ол мындан арысында Бабаланы Ибрагимни чыгъармачылыгъы бла бютюн теренирек шагъырейленирге излегенин да билдиргенди.

Айхай да, окъууда, чыгъармачылыкъ жаны бла да хунерли сабийлерибизни жетишимлери – ала жаланда кеслериникиле болуп къалмай, эм алгъа билим алгъан мектеплерини эмда окъутхан устазларыны да хайырындандыла. Аны бла бирге уа педагогланы усталыкъ жаны бла хазырлыкъларыны даражасыны белгисидиле.

Бюгюнлюкде сайлагъан окъуу юйлеринден бирине кирип, врач болур муратдады.  Самираны да, бусагъатда мектеплени бошагъан бирси сабийлени да умутлары толурларын биз да сюебиз, мындан арысында да жетишимле тежейбиз.

Трамланы Зухура.