Кёп болмай Къабарты-Малкъар къырал университетни социал-гуманитар институтуну доцентлери Бёзюланы Наима бла Хулчаланы Мариям «Россейни миллетлерини маданият эм тил байлыкъларын сакълауда билим бериуню магъанасы» деген экинчи битеуроссей конференциягъа къатышхандыла.  

 Форум Санкт-Петербургда А.И. Герцен атлы Россейни къырал педагогика университетини мурдорунда ётгенди. Анга къыралны 22 вузундан токъсандан артыкъ адам, экспертле, федерал институтла, толтуруучу эм закон власть органланы келечилери да къатышхандыла.

Конференцияда ёз тилни сакълау къыралны айнытыуда стратегия магъанасы болгъаныны юсюнден айтылгъанды. Ол санда жаш адамланы арасында ёз тилни даражасын кётюрюрча, биллинглени къыйматлыгъыны, проектни жашауда бардырыуну, байламлыкъда ишлерча жангы коммуникацияла къурауну эм жангы партнёрла тартынырча этиуню юсюнден айтхандыла.

Бу жаны бла оюмларын Къырал Думаны депутаты, жарыкъландырыу комитетни келечиси Эльвира Аиткулова, Совет Федерацияны алгъыннгы депутаты Римма Галушина эм Россейни миллетлерини ёз тиллери жаны бла федерал институтуну таматасыны орунбасары Саргылана Брызгалова да билдиргендиле.

Эсге сала айтсакъ, былтырдан бери Россейде жашагъан 42 миллетни ёз тиллеринден олимпиада ётдюрюледи. Саулай алып айтханда, анга къыралны 66 регионундан 12 минг адам къатышханды.

 Школчуланы арасында бардырылгъан ёз тилден олимпиада билим бериу программагъа киреди. Анда хорлагъанлагъа эм призёрлагъа да вузгъа кире туруп,  къошакъ бал берилирча онг тапдырылады. Ол себепден ол кёплеге ахшы себеплик этерчады.