КъМР-ни Башчысы Казбек Коков  Федерал жол агентствону коллегиясыны бирикген жыйылыууна къатышханды. Анда сёз жангы миллет проектни къурауну эмда бёлюмню  мардагъа келиширча этиуню юсюнден баргъанды. Андан сора да, РФ-ни Президенти Владимир Путинни оноуу бла башланнган «Къоркъуусуз эмда тынгылы жолла» миллет проектни жашауда бардырыуну, Россейде, Шимал Кавказда, Къабарты-Малкъарда да эсеплери туура этилгендиле. 

– Сёзсюз, арт беш жылны ичинде жолла бла байламлы миллет проектге кёре регионлада тамамланнган ишле экономика, социал жаны бла да бек магъаналыдыла. Жаланда бизни республикада 2019 жылдан бери автомобиль жолланы минг километри чакълы бири мардагъа келиширча этилгендиле,  300 километринде чыпынлы чыракъла орнатылгъандыла, жорукъ белгиле бла ызла жангыртылгъандыла, кёпюрле тап халгъа келтирилгендиле. Бек башы – жолла алгъындан эсе къоркъуусуз болгъандыла. 
Регионну жолларын жангыртыугъа бла ишлеуге беш жылны ичинде 20,5 миллиард сом бёлюннгенди, аны 14,7 миллиарды уа республикалы бюджетден берилгенди, – дегенди Казбек Коков. 
Ол айтханыча, Къабарты-Малкъарда транспорт бла жамауат къыйналмазча, жолла да къоркъуусуз болурча мадарла мындан ары да этилликдиле. Ол иш Россейни Президентини «Россей Федерацияны 2030 жылгъа эмда бара-баргъанда 2036 жылгъа дери айнытыуну миллет борчларыны юсюнден» май указына тийишлиликде бардырыладыла. «Транспортну ишин тап къурау, жолда жюрюу къоркъуусуз болурча этиу бизни баш борчларыбыз болгъанлай къаладыла. Туризмни, къурулуш бёлюмню, эл мюлкню айныулары, халкъыбызны ырахатлыгъы, къолайлыгъы да ма анга кёре боллукълары хакъды. Ол борчну тынгылы тамамларгъа битеу онгларыбыз бардыла, ол санда федерал ведомствола бла байламлыкъла къурау иш да барады»,– деп чертгенди КъМР-ни Башчысы. 
Казбек Коков къонакълагъа Къабарты-Малкъарны жокълагъанлары ючюн ыразылыгъын билдиргенди, жамауатха уа жол-транспорт мюлкню болумуна эс бургъаны ючюн ыспас этгенди. «Жамауатны кёз-къулакъ болуп тургъаныны хайырындан къыралыбызда, регионлада да тынгылы эмда къоркъуусуз жолланы саны ёсюп баргъанына ишексизме», – дегенди ол, деп жазылады КъМР-ни Башчысы телеграм-каналында.