«Заман» газетни жюз жыл юбилейине жоралап КъМР-ни Федерал почта службасы газетни сураты бла 100 минг конверт чыгъаргъанды. КъМР-ни Коллекционерлерини биригиую уа саугъагъа газетни тарыхын ачыкълагъан суратла бла эки тюрлю фотокарточкаладан тёрт жюз экземпляр чыгъаргъандыла, дагъыда эки жюз аллай суратлары бла маркала да этгендиле. Аланы Ауес Тхакахов жарашдыргъанды.
Жыйылыуда Коллекционерлени биригиуюню таматасы Сергей Грищенко «Заман» газетни юбилейи бла алгъышлагъанды. Ол саулай республиканы жашауунда да магъаналы дата болгъанын чертгенди. Анча жылны ичинде газетни журналистлери, окъуучуларына магъаналы информацияланы билдиргенлей тургъанлары иги жетишим болгъанын айтып, «Заман» газетни баш редактору Къонакъланы Хасаннга грамота бергенди. Ызы бла Хасан Азретович конвертге биринчи печатьны (белгини) салгъанды.
– Эм алгъа Россейни почтасына бла Коллекционерлени биригиуюне быллай магъаналы акция къурагъанлары ючюн ыразылыгъымы айтыргъа сюеме. Жюз жылны ичинде газетни тарыхы да сейир болгъанды.
Ол биринчи кере 1924 жылда «Къарахалкъ» деген ат бла чыгъып башлагъан эди, ызы бла «Ленинчи жол», «Социалист Къабарты-Малкъар», кёчгюнчюлюкден къайтхандан сора уа «Коммунизмге жол» деген атла бла басмаланнганды, 1991 жылдан башлаб а «Заман» деп чыгъады. Аты тюрленнгенликге ол не заманда да къыралны, республиканы, малкъар халкъны жашаууна уллу эс бургъанды.
Бюгюнлюкде да аллай борчун толтургъанлай турады. Андан сора да, газетни телеграм-каналы барды, «В контакте» социал сетьде да чыгъады. Бу датагъа уллу эс бурулгъанына ыразыма, биз кесибиз да редакцияда датагъа жоралап сурат галерея къурагъанбыз. Анда анча жылны ичинде ишлеп тургъан журналистлени суратлары бардыла, фронтха кетген журналистлеге уа энчи эс бёлгенбиз. Россейни почтасы энчи коллекционер Ауес Тхакахов бла бирге ол жигит журналистлени атлары-тукъумлары жазылгъан фотокарточка да чыгъаргъанбыз. Ала барысы да битеу Россейге жайылырла, белгили болурла деп къууанабыз, ыразылыгъыбызны да билдиребиз, – дегенди газетни баш редактору.
– «Заман» газет миллетибизни, республикабызны да бетин кёргюзтеди. 100 жылны ичинде ол бек узун, къыйын жолну да ётгенди. Бир жол китапханагъа барып, кёчгюнчюлюкден сора биринчи чыкъгъан номерлери къаллайла болгъанларына къарагъанымда, биринчиси 1957 жылда бешинчи майда чыкъгъанын билгенме. Халкъ мартны ахырында туугъан жерине къайтып, майны биринчи кюнлеринде уа ариу тюрсюнлю газет чыкъгъаны сейир этдирген эди. Ол газетни чыгъаргъан белгили инсанларыбызны санында уа Тёппеланы Алим, Шахмырзаланы Саид, Кациланы Хабу эм да башха ахшы адамларыбыз болгъандыла. Ала чыгъармачылыкъгъа аллай уллу эс буруп, миллетни жашауун ачыкълап башлагъанлары аланы керти да фахмулу, миллетлерин сюйген инсанла болгъанларын кёргюзтеди. Бюгюн да газет ишине кертичилей турады, маданиятха, политикагъа, спортха, абаданлагъа, жаш тёлюге да уллу эс бургъанлай турады. Миллетни газетге жюз жылны ичинде сюймеклиги уа мындан ары да таркъаймазлыгъына ышанама, – дегенди газетни баш редакторуну орунбасары Жангуразланы Нажабат.
Россейни почтасыны Хасанияда бёлюмюню таматасы Фрийланы Аминат да «Заманны» редакциясын алгъышлагъанды. Элде газетни алгъанла да аслам болгъанларын, сюйюп сакълагъанларын да айтханды. Къонакъланы Хасан да алагъа ишлерин иги бардыргъанлары ючюн ыразылыгъын билдиргенди. Газет алгъанланы саны бу жылны жарымында да иги ёсгенин, ол почтада ишлегенлени да къыйыны болгъанын да чертгенди.
Ол кезиуде почтагъа жумушу бла келген 80-жыллыкъ Лариса Мизина да тюбешиуге къатышханды. Ол элли жылны республикада жашагъанын, таулу нёгерлери да кёп болгъаны себепли, газетни да иги билгенин чертгенди. Жыйылыугъа тюбеп къалгъанына къууаннганын айтып, кесине конверт, фотокарточка, марка да алгъанды. Россейде жашагъан танышларын да къууандырып, интернет къауумлагъа конвертни суратын ашыргъанын да билдиргенди.
Жыйылгъанла ахырында эсде къаллыкъ суратлагъа тюшгендиле эмда бу хычыуун жумуш бла дагъыда бир кере бир бирлерин алгъышлагъандыла.
Темуккуланы Амина.
Суратны Холаланы Марзият алгъанды.
