Налшык щекIуэкIа Къэ­рал гъуэгу агентствэм и коллегие убгъуам КIуэ­кIуэ Казбек хэтащ. Ар теу­хуат лъэпкъ проектыщIэ къы­зэ­гъэпэщынымрэ къудамэм епха хабзэхэр убзыхунымрэ. Къинэмы­щIауэ, зэIущIэм къыща­гъэ­­лъэгъуащ УФ-м и Пре­­зидент Путин Владимир и жэрдэмкIэ къыхалъ­хьауэ щы­та «ГъуэгуфI шы­нагъуэн­шэхэр» пэхуэ­щIэр Урысейм, Кавказ Ищхъэрэм, Къэбэрдей-Балъкъэрым зэ­фIэха зэрыщыхъуам теухуа бжы­гъэхэр. 

Шэч хэмылъу, иужьрей илъэситхум наIуэ къэхъуащ гъуэгу лъэпкъ проектыр щылэжьа щIыналъэхэм я экономикэри цIыхубэ гъащIэри зэрефIэкIуар. Ди рес­публикэм и закъуэ 2019 гъэ лъандэрэ машинэ  гъуэгу километр 1000-м нэс зэрыщытыпхъэ щытыкIэм щрагъэувэжащ, километр 300-м нэс щIыналъэ зэхуакухэм щызэпрашащ, куэ­дым бжыхьхэр ирагъэувэ­кIащ, гъуэгу дамыгъэхэр къа­гъэщIэрэщIэжащ, лъэ­мыжхэр зэрагъэпэщыжащ. ЕхъулIэныгъэ нэхъыщхьэ­ра­щи, гъуэгухэр нэхъ шынагъуэншэ хъуащ. Илъэси­т­хум и кIуэцIкIэ гъуэгухэр егъэ­фIэкIуэным мылъкуу халъхьар сом мелард  20,5-м щIегъу, абы щыщу сом мелард 14,7-р ди республикэм и бюджетым къы­хэкIыу. 
«Дэ дяпэкIи Къэбэрдей-Балъкъэрым и гъуэгухэм я фIагъымрэ шынагъуэншагъэмрэ едгъэфIэкIуэнущ, - щитхащ КIуэкIуэ Казбек и телеграм каналым. - Абы лъаб­жьэ хуохъу УФ-м и Президентым накъыгъэм къыдигъэкIа «Урысейм - 2030 гъэм, зегъэубгъуауэ - 2036 гъэм пщIондэ зэры­зиужьыну щIыкIэм епха лъэпкъ мурадхэр» унафэр. Транспортымрэ гъуэгу­хэмрэ едгъэ­фIэкIуэныр дэ лэжьыгъэ псо­ми япэ идогъэщ. Абы бы­дэу епхащ ­туризмэри, ухуэныгъэ лэ­жьыгъэхэри, экономикэм и мэкъумэш къудамэри, цIы­хубэм и псэу­кIэри. Iуэ­хум етхьэлIапхъэ псори диIэщ, лэжьыгъэ­хэр йокIуэкI, лъэныкъуэ псом­кIи къэрал унафэщ­I­хэм дечэнджэщ зэпытщ».
КIуэкIуэ Казбек хьэщIэ­хэм фIы­щIэ яхуищIащ Къэ­бэр­дей-Балъкъэрым къы­зэ­реб­лэгъам, абы и гъуэгу-транспорт къудамэм гулъы­тэшхуэ къы­зэ­ры­хуа­щIым щхьэкIэ: «ЦIыхубэ кIэлъып­лъы­ны­гъэхэм я фIыгъэкIэ ди къэ-ралым кIуэ пэтми и гъуэгухэр нэхъыфI икIи  нэхъ шынагъуэншэ зэры­хъунум шэч къытесхьэркъым».