КъБР-м и Парламентым дыгъуасэ щагъэлъэпIащ щIыналъэм и лэжьа­-кIуэ 70-м нэблагъэ. Республикэм и хабзэубзыху IуэхущIапIэм и ЩIыхь тхы­лъымрэ КъБР-м и Парламентым и УнафэщIым и ФIыщIэ тхылъымрэ хуа­гъэфэщащ егъэджэныгъэм, щIэныгъэм, узыншагъэр хъумэным, жыла­гъуэ-политикэ гъащIэм, щэнхабзэм, промышленностым, экономикэм, спортым хэлъхьэныгъэ хуэзыщIхэм.

- Зи гуащIэкIэ пщIэ къэзылэжьыжа, щIыналъэм и Iуэхухэр егъэфIэкIуэ­ным емызэшыжу пэрыт цIыхухэр нобэ ди ­гуапэу догъэлъапIэ, - жиIащ КъБР-м и Парламентым и УнафэщI Егоровэ Татьянэ. - Фи ехъулIэныгъэхэм, шэч хэ­мылъу, къару куэд тевгъэкIуэдащ. Псоми зэрытщIэщи, апхуэдэ зэфIэкIым ущылъэIэсыр узыпэрыт лэжьыгъэр фIыуэ плъагъуу, уегугъуу убгъэдэтмэщ, цIыхубэмрэ жылагъуэмрэ сэбэп ухуэ­хъуну ухуэпабгъэмэщ. Иджыпсту Къэ­бэрдей-Балъкъэрым зэрызиужьар псоми долъагъу. Абы фэ фщыщ дэтхэнэ ­зыми хэлъхьэныгъэ хуищIащ. ФIыщIэ фхузощI фи гуащIэ фемыблэжу фи IэнатIэхэм фызэрыпэрытым, Хэкум фы­зэ­рыхуэпэжым щхьэкIэ. Си фIэщ мэхъу, фэ фхуэдэ лэжьакIуэшхуэхэр диIэмэ, сыт хуэдэ лъэпощхьэпори къызэрызэд­нэ­кIынур, ди къалэнхэм дазэры­пэ­лъэ­щы­фынур. Си гуапэу сынывохъуэхъу узыншагъэ быдэ, мамырыгъэ, гуапагъэ, ехъу­лIэныгъэщIэхэр дяпэкIи фиIэну. 
ЦIыхухэр щIыуэпс къэхъукъащIэ шынагъуэхэм щыхъумэнымрэ апхуэдэхэм    я лъэужьыр гъэкIуэдыжынымрэ, апхуэ­дэуи хабзэр къызэгъэпэщыным хэлъэ­ныгъэфI зэрыхуищIым папщIэ, КъБР-м  и Парламентым и ЩIыхь тхылъыр хуа­гъэфэщащ УФ-м ЦIыхубэр хъумэнымкIэ, къэхъукъащIэ шынагъуэхэмрэ абы­хэм я лъэужьыр гъэкIуэдыжынымкIэ и министерствэм и управленэ нэхъыщ-хьэу КъБР-м щыIэм цIыхухэр хъумэ­нымкIэ и IэнатIэм и унафэщI - Управленэ нэхъыщхьэм и унафэщIым и къуэдзэ Анаев Мыхьэмэт. 
Хэку зауэшхуэм хэкIуэда зауэлIхэм я фэеплъыр уахътыншэ хъуным зэре­лэ­жьым папщIэ, дамыгъэ лъапIэр хуа­гъэ­фэщащ Бахъсэн районым и щIыпIэ администрацэм егъэджэныгъэмкIэ и управленэм и IэщIагъэлI нэхъыщхьэ Нэхущ Дианэ. 
ЩIэблэр хэкупсэу къэгъэхъуным, цIыхухэм я хуитыныгъэхэмрэ щхьэхуитыныгъэмрэ къызэгъэпэщыным хэлъ­хьэ­ныгъэ зэрыхуащIыр къалъытэри,    КъБР-м и Парламентым и ЩIыхь тхы­лъыр иратащ ветеранхэм я «Боевое братство» урысейпсо зэгухьэныгъэм и Къэбэрдей-Балъкъэр щIыналъэ къудамэм хэтхэу Мельник Михаил, Панин Дмитрий, Сотников Александр, Ульбашев Келлет сымэ. Апхуэдэу ягъэлъэпIащ Къэбэрдей-Балъкъэр къэрал мэкъумэш университетым и лэжьакIуэ зыбжанэ. 
Щэнхабзэм къыщагъэлъагъуэ зэфIэ­кIымрэ ехъулIэныгъэхэмрэ папщIэ, хабзэубзыху IуэхущIапIэм и ЩIыхь тхылъыр хуагъэфэщащ: «Первый свет» кинокомпанием и унафэщI, режиссёр, продюсер Ерокъуэ Бишер, Аруан районым и сабий музыкэ школым и унафэщIым и къуэдзэ Налетовэ Дианэ, нэгъуэщIхэми. 
Республикэм и промышленностым хэлъхьэныгъэ зэрыхуищIым папщIэ, дамыгъэр зыхуагъэфэщахэм ящыщщ  «ЭРПАК» акционер зэгухьэныгъэм и гене­ральнэ унафэщI Ерчэн Хъусен.
ЗэIущIэм КъБР-м и Парламентым и депутат зыбжани щагъэпэжащ, Налшык къалэ округым къыбгъэдэкIыу.

БАГЪЭТЫР Луизэ. 

Сурэтыр Къарей Элинэ трихащ.