Унагъуэм, лъагъуныгъэм, зэхуэпэжыныгъэм и махуэм ирихьэлIэу КъБКъУ-м Те­мыр­къан Юрэ и цIэр зезыхьэ и пэшым зэIущIэ гуапэ ще­кIуэкIащ. «Лъагъуныгъэмрэ зэгурыIуэныгъэмрэ папщIэ» медалыр зыхуагъэфэщахэм, ди республикэм и рай­онхэм щыпсэу унагъуэ 67-м, гуфIэгъуэ щытыкIэм иту иратыжащ. Унагъуэ насыпы­фIэ зыухуэфауэ щапхъэу къэплъытэ хъуну, илъэс 25-м щIигъуауэ зыдэпсэу зэщхьэгъусэхэми дамыгъэ щхьэхуэ­хэр хуагъэфэщащ. ЗэIущIэр къы­зэрагъэпэщащ КъБР-м Лэ­жьыгъэмрэ социальнэ дэIэ­пыкъуныгъэмкIэ и ми­ни­с­тер­ст­вэм и жэрдэмкIэ.

Пшыхьыр къызэIуихащ Къэбэрдей-Балъкъэр Республикэм и Парламентым и УнафэщI Егоровэ Татьянэ. 
- ГъащIэм щынэхъыщхьэ ды­дэр унагъуэмрэ абы илъ зэ­хущытыкIэмрэщ. ЛIэщIыгъуэ­кIэрэ къогъуэгурыкIуэ уна­гъуэр нэхъ лъапIэ дыдэхэр - лъагъуныгъэр, зыр адрейм хуэсакъыныр, хуабагъэр - цIы­хум езыт быдапIэу. Урыс тха­кIуэ икIи гупсысакIуэ цIэрыIуэ Толстой Лев «НасыпыфIэр и унагъуэм щынасыпыфIэрщ» и псалъэхэм я мыхьэнэр хэт нэхъри нэхъыфIу къагуроIуэ нобэ зи унагъуэцIэ къитIуэнухэм. Фэ фщыщ дэтхэнэ зыми гъащIэм лъэ быдэкIэ хэува быныфIхэр вгъэсащ, фи зэхущытыкIэ дахэхэр къытщIэхъуэ щIэблэм я дежкIэ щапхъэфIщ, лъагъуныгъэм, зэ­хуэ­пэ­жы­ныгъэм, пщIэм и джэлэсщ. Унагъуэм щызекIуэ хабзэ щхьэхуэхэм, абы илъ гуфIэгъуэм, языныкъуэхэм и деж гугъуехьхэм, хэпсэукI цIыхум къыгуроIуэ а хъугъуэ­фIыгъуэхэр хуэсакъыпэу пхъу­мэн хуей тыгъэу зэрыщытыр. Нобэ къекIуэкI гъащIэ мы­тыншым, зэIумыбзым щапхъэ щыхъун хуейр фи дуней тетыкIэмрэ сабийм хэфлъхьэ гъэсэныгъэмрэщи, гъуазэу фы­къалъытэрэ нэхъыбэ къыв­дэплъеймэ, унагъуэщIэ­хэм зэрызаузэщIынум шэч хэлъкъым, - жиIащ Егоровэм. 
Я унагъуэхэр насып кIуапIэу, лъагъуныгъэр щытепщэу, дэт­хэнэ зы дакъикъэми гуфIэгъуэрэ псэ тыншыгъуэрэ къы­дэкIуэу псэуну ехъуэхъуащ ар зэIущIэр зи щхьэусыгъуэ дахэкIэ къызэхуэса унагъуэхэм. А хъуэхъу псалъэхэр даIыгъыу, нысыпым и къигъэхъуа­пIэр унагъуэр арауэ зэрыщы­тыр, абы нэхъ лъапIэ зэры­щымыIэр къыхагъэщу пшы­хьым къыщыпсэлъащ КъБР-м и Правительствэм и Унафэ­щIым и япэ къуэдзэ Говоров Сергейрэ КъБР-м лэжьыгъэмрэ социальнэ дэIэпыкъу­ныгъэмкIэ и министр Асанов Алимрэ. 
«Лъагъуныгъэмрэ зэгуры­Iуэныгъэмрэ папщIэ» медалымрэ саугъэтхэмрэ унагъуэ­хэм иратащ Асанов Алим, Налшык ЗАГС-м и унафэщI Шэру Валентинэ, КъБР-м и Iэтащхьэм и чэнджэщэгъу Уянаевэ Iэминат, ди республикэм и ЦIыхубзхэм я зэгухьэныгъэм и гуащэ Къаскъул Iэулият, КъБР-м и Парламентым и депутат, Афганистаным щы­Iахэм, зауэхэмрэ дзэ зэпэщIэ­тыныгъэхэмрэ хэтахэм я зэгухьэныгъэм и уна­фэщI Тхьэгъэлэдж Тимур, «Горянка» газетым и редактор нэхъыщхьэ Къаныкъуэ Заринэ, «Намыс» IуэхущIапIэм и унафэщI Къардэн Адэлбий сымэ. 
Пщыхьэщхьэр езыгъэкIуэ­кIахэу КъБР-м щIыхь зиIэ и журналист Аттаев Азноррэ ди республикэм щIыхь зиIэ и     артисткэ Тхьэщыгъуей Жаннэрэ къызэхуэсахэр щагъэ­гъуазэрт унагъуэхэм я псэу­кIэм, я ехъу­лIэныгъэхэм.
ЗэIущIэм хэтахэм фэеплъ сурэтхэр зытрагъэхащ, концерт дахэкIэ я нэгу зрагъэужьащ. Апхуэдэу уэрэд жаIащ, къэфащ зэщхьэгъусэ­хэу Рокотов Даниилрэ Крис­тинэрэ, «Гордость Кавказа» ансамблыр, «Иоканто» сабий уэрэджыIакIуэ студиер, иджырей къафэхэмкIэ щапхъэ зытрах «Арабеск» гупыр, Хъусин Анзоррэ абы и щхьэ­гъусэ Жабоевэ Замирэрэ, къа­фэмкIэ «Кабардинка» къэрал академическэ ансамблым хэт, КъБР-м щIыхь зиIэ и артист Дер Мухьэмэд, Иуан Каринэ сымэ. 
Узыншагъэ быдэ, насып мы­кIуэщI, дыгъэпс махуэ куэд унагъуэ псоми яIэну ди гуа­пэщ!
ИСТЭПАН Залинэ.